Reformalar nátiyjesi máhállelerdiń kelbetinde hám xalqımız turmısında ayqın kórinbekte

Mámleketimiz basshısı dáslep rayonnıń Ittifoq máhállesindegi Yangi Sergeli kóshesinde ámelge asırılǵan jumıslar jáne sawda hám xızmet kórsetiw obektleriniń jumısı menen tanıstı.

Turizm hám xızmet kórsetiw tarawı az qárejet penen kóp jumıs ornın jaratıw, xalıqtıń dáramatın arttırıw hám aymaqlardıń kórinisin jaqsılawda úlken áhmiyetke iye. Tashkent qalasında bul baǵdarda úlken imkaniyatlar bar.

Jańa Sergeli kóshesinde shólkemlestirilgen 24/7 rejiminde isleytuǵın turizm, sawda hám xızmet kórsetiw obektleri xalıqqa qolaylı sharayat jaratıw, isbilermenlikti rawajlandırıw hám jańa jumıs orınların ashıwǵa xızmet etpekte.

Joybardıń ulıwma bahası 18,7 milliard sumdı quraydı. Kósheniń 2,1 kilometr bóleginiń infrastrukturası tolıq jaqsılanıp, sawda, ulıwma awqatlanıw hám kewilashar xızmetlerdi óz ishine alǵan kúni-túni jumıs alıp baratuǵın aymaqqa aylandırıldı.

Xalıqtıń dem alıwı hám salamat turmıs tárizin qollap-quwatlaw maqsetinde 10 nan aslam balalar maydanshaları, 8 vorkaut zonası, kitap dúkánı hám nuranıylar orayı shólkemlestirildi.

Aymaq átirapındaǵı 4 máhállede 21 mıńnan aslam xalıq jasaydı. Jańa Sergeli kóshesinen kúnine ortasha 15-20 mıń avtotransport quralı háreketlenedi. Joybar tolıq iske qosılǵannan soń, jılına 1,2 millionnan aslam keliwshilerge xızmet kórsetiw imkaniyatı jaratıladı.

Joybar sheńberinde 250 den aslam jańa jumıs ornı ashıldı. 95 isbilermenlik subektiniń jumısı keńeytilip, 22 jańa isbilermenlik subekti shólkemlestirildi.

Mámleketimiz basshısı máhálle boylap júrip, milliy arxitekturalıq usılda ońlanǵan turaq jaylar, abadanlastırılǵan kósheler hám xalıq ushın jaratılǵan qolaylıqlar menen tanıstı. Máhálle belsendileri hám puqaralar menen qızǵın sóylesti.

Prezidentimiz ámelge asırılıp atırǵan jumıslar xalıqtıń turmıs dárejesi hám abadanlıǵına qanday tásir kórsetip atırǵanı menen qızıqtı. Máhálle belsendileri bul ózgerisler xalıqtıń keypiyatı, turmıs tárizi hám dáramatına unamlı tásir kórsetip atırǵanın, aymaqtıń kelbeti de, adamlardıń erteńgi kúnge isenimi de ózgerip atırǵanın atap ótti.

Bunnan soń Prezident Shavkat Mirziyoev Sergeli rayonında jaylasqan “Global International Hospital” jeke menshik kóp tarmaqlı medicina orayına bardı.
Elimizde xalıqtıń salamatlıǵın qorǵaw, medicinalıq xızmetlerdiń sapasın hám qamtıp alıwın arttırıw mámleketlik siyasattıń tiykarǵı baǵdarlarınan. Usı maqsette tarawǵa investiciyalar tartılıp, medicinada jeke menshik sektor jumısı da qollap-quwatlanbaqta.

Bul zamanagóy medicina orayı búgingi kúnde xalıqqa talap joqarı bolǵan kóplegen baǵdarlar boyınsha medicinalıq xızmet kórsetiw imkaniyatına iye.
Oraydı qurıw ushın 30 million dollar investiciya qaratılǵan. Bul jerde jılına 150 mıńnan aslam xalıqqa medicinalıq xızmet kórsetiw imkaniyatı jaratıladı. Ulıwma maydanı 0,5 gektar bolǵan mákemede jıllıq xızmetler kólemin 15 milliard sumǵa jetkeriw rejelestirilgen.

Mámleketimiz basshısına oraydıń jumısı haqqında prezentaciya ótkerildi. Prezidentimiz xirurgiya, reanimaciya hám emlew bólimleri, situaciyalıq orayda jaratılǵan sharayatlardı kózden ótkerdi.

Joybar sheńberinde 250 jańa jumıs ornı jaratılǵan. Jámáátte sırt elde tájiriybe arttırǵan 10 nan aslam joqarı mamanlıqtaǵı qánige hám sırt elli shıpakerler de bar.
Oray Ullı Britaniya, Italiya hám Germaniyadan alıp kelingen zamanagóy medicinalıq úskeneler menen támiyinlengen. Atap aytqanda, mákemege “PHILIPS” kompaniyasınıń aldınǵı medicinalıq texnologiyaları ornatılǵan.

Mámleketimiz basshısı oraydı ayırım baǵdarlar boyınsha tayanısh medicina mákemesine aylandırıw áhmiyetli ekenligin atap ótti. Bul jerde toplanatuǵın aldınǵı tájiriybe tiykarında shıpakerlerdiń mamanlıǵın arttırıw hám zamanagóy medicinalıq xızmetlerdiń qamtıp alıwın keńeytiw boyınsha juwapkerlerge kórsetpeler berildi.

Prezidentimiz oray xızmetkerleri menen sóylesti. Tarawda miynet etip atırǵan qánigelerdi qollap-quwatlaw, jeke menshik medicina shólkemleriniń sanın kóbeytiw jáne xalıqqa sapalı, zamanagóy hám nátiyjeli medicinalıq xızmet kórsetiw máselelerine ayrıqsha itibar qaratıldı.

– Hár bir nawqasqa sapalı hám múnásip xızmet kórsetiw menen birge, medicinalıq hám turizm xızmetlerin úylestiriw zárúr. Bul baǵdardı keńnen úgit-násiyatlaw, sırt el tájiriybesin úyrenip, emlewxanalar janında miymanxana infrastrukturasın rawajlandırıw kerek, – dedi mámleketimiz basshısı.

Prezidentimiz Sergeli rayonındaǵı Ózgaris máhállesinde ámelge asırılǵan dóretiwshilik jumısları jáne jer ústi metro jónelisi astında shólkemlestirilgen sawda hám xızmet kórsetiw obektleriniń jumısı menen de tanıstı.

Insan qádirin ulıǵlaw hám xalıqtıń abadanlıǵın támiyinlewge qaratılǵan izbe-iz reformalar búgin máhállelerdiń kelbetinde, adamlardıń kúndelikli turmısında ayqın kózge taslanbaqta.

Ózgeris máhállesi bul baǵdardaǵı jańalanıwlardıń ayqın úlgisi bolıp esaplanadı. Bul aymaqta 45 kóp qabatlı jay, 1 mıń 620 kvartira bar. Olarda 6 mıń 700 den aslam xalıq jasaydı.

Máhállede jıllar dawamında toplanıp qalǵan mashqalalar basqıshpa-basqısh sheshilip, zamanagóy infrastruktura hám qolaylı sociallıq ortalıq jaratıldı. Atap aytqanda, 10 balalar maydanshaları, mini-futbol maydanı, 2 salamatlıq zonası qurıldı.

Mámleketimiz basshısı máhállede shólkemlestirilgen zamanagóy kogeneraciya orayınıń jumısı menen de tanıstı.

Atap ótilgenindey, bul oray gúzgi-qısqı máwsimde máhálleniń ıssılıq hám elektr energiyası támiynatınıń turaqlılıǵına xızmet etedi. Kogeneraciya texnologiyası arqalı tábiyiy gazden aldın elektr energiyası alınadı, soń ajıralıp shıqqan ıssılıq suw hám turaq jaylardı ısıtıwǵa baǵdarlanadı. Bul energiya nátiyjeliligin arttırıp, ısırapgershilikti azaytadı.

Joybardıń ulıwma bahası 5,8 million dollardı quraydı. Bul jerge Germaniyada islep shıǵarılǵan zamanagóy gaz-porshenli qurılmalar hám qazanlar ornatılǵan. Oray jılına 18,4 million kilovatt-saat elektr energiyası hám 80 mıń gigakaloriya ıssılıq energiyasın islep shıǵarıw imkaniyatına iye.

Joybar sheńberinde 2 kilometr uzınlıqtaǵı joqarı kúshleniwli elektr liniyası qurılıp, ulıwmalıq tarmaqqa jalǵandı. Nátiyjede rayonlıq oraylıq elektr tarmaǵındaǵı júkleme 3 procentke azaydı. Oraydıń iske qosılıwı menen 10 turaqlı jumıs ornı jaratıldı.

Sonıń menen birge, máhálleniń ulıwma infrastrukturası da túp-tiykarınan jańalandı. 1,4 kilometr piyadalar jolları qurıldı, 12 kóp qabatlı jaydıń fasad bólegi ońlandı, ishki jollarǵa asfalt tóseldi. Aymaqtı kóklemzarlastırıw maqsetinde 2 mıń 720 túp sayamanlı terek hám puta nálleri egildi.

Prezidentimiz “máhálle jetiligi” hám aymaq belsendileri menen qızǵın sáwbetlesti. Bul jerdegi ózgerisler xalıq ushın múnásip turmıs sharayatın jaratıw, máhálleni abat hám qáwipsiz orınǵa aylandırıwǵa qaratılǵan jumıslardıń nátiyjesi ekeni atap ótildi.

– Keń kólemli dóretiwshilik jumıslarımız mine usı Sergeli rayonınan baslanǵan edi. Óz waqtında bul aymaqqa zamanagóy metro liniyasın alıp keliw baslamasın alǵa qoyǵanımızda, bul iri joybardıń keleshegine gúman menen qaraǵanlar da bolǵanı sır emes.

Biraq, búgin mine usınday kórkem hám abat orınlardı, eń áhmiyetlisi, sizdey áziz watanlaslarımızdıń kewilli júzlerin kórip, tańlaǵan jolımız qanshelli durıs bolǵanına jáne bir márte isenim payda etemiz.

Búgingi saparımızdan maqset te sizler menen tikkeley sóylesiw, usınıs hám baslamalarıńızdı tıńlaw bolıp tabıladı, – dedi Prezidentimiz.

Mámleketimiz basshısı jol-jónekey Sergeli rayonınan ótetuǵın jer ústi metro jónelisi astında shólkemlestirilgen sawda hám xızmet kórsetiw obektlerin kózden ótkerdi.

Zamanagóy qala qurılısında bar infrastrukturadan aqılǵa uǵras paydalanıw, bos maydanlardı xalıq ushın qolaylı, ekonomika ushın nátiyjeli orınlarǵa aylandırıw úlken áhmiyetke iye. Usı maqsette jer ústi metro jolınıń astındaǵı 5,7 gektar maydan túp-tiykarınan jańalandı.

Bul jerde 137 isbilermenlik subekti shólkemlestirilip, 250 jańa jumıs ornı jaratıldı. Metro astında 4 kilometr piyadalar hám velosiped jolı, 2 balalar maydanshaları hám sport zonaları shólkemlestirildi. Xalıqtıń dem alıwı ushın 100 orınlıq hám 40 zamanagóy sayamanlı shıraq ornatıldı.

Bunnan soń Prezident Shavkat Mirziyoev Sergeli rayonı hákimligine bardı.

Mámleketimiz basshısına dáslep hákimlik imaratında rayon uyımlarınıń “bir ayna” principi tiykarında shólkemlestirilgen jumısı haqqında maǵlıwmat berildi. Rayon hákimligi imaratında hákimlikten tısqarı jáne 5 shólkem jumıs alıp barıp, olar tárepinen xalıq hám isbilermenlerge 30 dan aslam túrdegi mámleketlik xızmetler kórsetilip kelinbekte.

Atap aytqanda, Ishki isler ministrligine onlayn múrájat etiw qurılması xalıq ushın bir qansha jeńillikler jaratadı. Bul sistemadan múrájat jollanǵanda náwbetshi inspektor videobaylanıs arqalı múrájat etiwshi menen baylanısadı. Múrájat avtomatikalıq dizimge alınadı. Múrájat etiwshi jumıs nátiyjesi, inspektor qatnası, háreketi haqqında óziniń bahasın qoyadı.

Mámleketimiz basshısı bunday “aqıllı” qurılmalardı xalıq kóp jıynalatuǵın orınlar, bazar hám basqa da obektlerge kóbirek ornatıw boyınsha tapsırma berdi.
Hákimlikte jaǵdaylar orayı shólkemlestirilgen. Jasalma intellekt tiykarında tallaw, mashqalalardı jedel anıqlaw hám sheshiw boyınsha “Aqıllı rayon” platforması iske qosılǵan. Jaǵdaylar orayında 17 málimleme sistemasınıń óz-ara baylanısqanı xalıq penen islesiwdi jańa basqıshqa alıp shıǵadı.

Bul jerde sociallıq hám kommunallıq mashqalalar monitoring etiledi, xalıqtıń múrájatlarınıń orınlanıwı qadaǵalawǵa alınadı, ayrıqsha jaǵdaylarda tiyisli xızmetlerdiń jumısı operativ basqarıladı hám muwapıqlastırıladı.

Jaǵdaylar orayın iske túsiriw sheńberinde rayonnıń 46 máhállesi menen videokonferencbaylanıs jolǵa qoyılǵan hám oray menen integraciyalanǵan. Sonday-aq, rayondaǵı 25 mektep jaǵday oraylarına integraciyalanbaqta.

Platforma quramındaǵı “Qáwipsiz rayon” sisteması huqıqbuzarlıqlardı monitoring etiw hám jámiyetlik qáwipsizlikti támiyinlewge xızmet etedi.

Isbilermenlik subektleriniń sanlı kartası jasalma intellekt analizi tiykarında salıq túsimlerin prognozlaw hám olardıń jıynalıwın támiyinlewge qaratılǵan. “AI Davomat” sisteması bolsa mekteplerde sebepsiz sabaq qaldırıw jaǵdayların saplastırıw, jas óspirimler arasında qadaǵalawsızlıqtıń aldın alıwda ayrıqsha áhmiyetke iye.

Prezidentimiz jaǵdaylar orayınıń jumısı menen tanısıp, bul jańa sistemanı paytaxtımızdıń qalǵan rayonlarında da engiziwge tapsırma berdi. Tashkent qalasında bilimlendiriw sisteması, qurılıs tarawın sanlastırıw, jasırın ekonomikanı qısqartıw hám salıqlardıń jıynalıwın arttırıw, jámiyetlik qáwipsizlikti támiyinlew boyınsha juwapkerlerdiń esapları tıńlandı.

Usı jerde Prezident Shavkat Mirziyoevtiń basshılıǵında Tashkent qalasın, atap aytqanda, Sergeli rayonın sociallıq-ekonomikalıq rawajlandırıw hám máhállelerde qáwipsiz ortalıq jaratıw máseleleri boyınsha videoselektor májilisi bolıp ótti.

Mámleketimiz basshısı sońǵı jılları Sergeli rayonında úlken ózgerisler ámelge asırılǵanın atap ótti. Jaqınǵa shekem paytaxttıń shetki aymaǵı esaplanǵan Sergelide xalıq jumıs islew, dáramat tabıw, dem alıw hám medicinalıq xızmetlerden paydalanıw ushın tiykarınan qala orayına barıwǵa májbúr edi.

Búgin bolsa rayonda ortalıq hám adamlardıń jasaw tárizi túp-tiykarınan ózgerdi. Keyingi on jılda bul jerde 30 mıń kvartiralı jańa turaq jaylar, ulıwma maydanı 2 million kvadrat metr bolǵan sanaat, sawda hám servis obektleri qurıldı.

Isbilermenlerdiń sanı 2,5 mıńnan 6 mıń 200 ge kóbeydi. Rayonda qáliplesken byudjet túsimleri 382 milliard sumnan 2 trillion 200 milliard sumǵa, yaǵnıy 5,5 esege arttı. Xalıq ushın 5 iri dem alıw ornı hám dem alıw baǵları iske qosıldı.

Tashkent wálayatınan ótken 13 máhálle esabınan Sergeli rayonınıń aymaǵı 1 mıń 800 gektarǵa keńeyip, jámi 5,6 mıń gektarǵa jetti. Rayondı basqa aymaqlar hám qala orayı menen baylanıstıratuǵın 9 kilometrlik jol, 8 stanciyadan ibarat jańa metro liniyası qurıldı.

Mektep orınları 25 mıńnan 38,5 mıńǵa, baqsha orınları 7,5 mıńnan 15,5 mıńǵa kóbeydi. 50 mámleketlik hám jeke menshik klinika ashıldı.

Sonıń menen birge, transport, jol, elektr, suw hám kanalizaciya sıyaqlı infrastruktura tarmaqların jaqsılaw boyınsha sheshimin kútip atırǵan máseleler ele kóp ekeni atap ótildi.

Xalıqtı xatlawdan ótkeriw boyınsha dáslepki nátiyjeler Sergeli rayonındaǵı real jaǵdaydı anıq kórsetti. Aldın rayon xalqı 181 mıń dep esaplanǵan bolsa, xatlaw nátiyjesine bola, aymaqta haqıyqatında 236 mıńǵa shamalas xalıq jasaytuǵını málim boldı. Jaqın jıllarda Sergeli xalqınıń sanı 300 mıńnan artıwı kútilmekte.

Sol sebepli, basshılarda turaq jay, baqsha, mektep, poliklinika hám jumıs orınların xalıqtıń ósiwine sáykes kóbeytiw boyınsha házirden anıq reje hám baǵdarlama bolıwı zárúr ekenligi bildirildi.

Bıyıl Sergeli rayonın rawajlandırıw ushın byudjetten 173 milliard sum, bankler arqalı 2 trillion 200 milliard sum resurs ajıratılǵan. Rayon hákimi hám juwapkerlerge bul qarjılardı nátiyjeli jumsap, qosımsha qundı 2-3 esege kóbeytiw boyınsha rejelerdi ámelge asırıw wazıypası qoyıldı.

Usı jılı paytaxt rayonları jámi 9 milliard dollarlıq investiciyalıq joybarlardı ámelge asırıwı belgilengen. Sergeliniń ózine ótken bes ayda 236 million dollar investiciya kirgizildi. Jıldıń aqırına shekem 60 joybardı baslaw esabınan jáne 750 million dollar investiciya tartıw rejelestirilgen.

Paytaxt sharayatında sanaat joybarların jaylastırıwda jer máselesi eń úlken mashqala ekeni kórsetip ótildi. Sonlıqtan, “Jańa áwlad” sanaat zonasınan paytaxtımızdıń 12 rayonına orın ajıratıw hám investiciya, sanaat, jumıs ornı, eksport hám byudjet túsimi kórsetkishlerin joybarlaǵan rayonnıń ózine jazıw sistemasın engiziw tapsırıldı.

Májiliste jer ústinen ótken metro jónelisi astında sawda hám servis obektlerin shólkemlestiriw tájiriybesi de kórip shıǵıldı. Onda mámleket jerden paydalanıw huqıqın aukcionǵa shıǵarıp, joybar hám infrastrukturasın tayarlap beredi, qalǵanın isbilermenler ámelge asıradı.

Sergelide metro liniyasınıń jáne 8,5 kilometr bóleginde usınday jumıslar juwmaqlansa, 137 sawda-servis obekti, 1-1,5 mıń jumıs ornı jaratıladı, rayon byudjetine 20-25 milliard sum qosımsha túsim túsedi.

Ulıwma etip aytqanda, jer ústi metro liniyasınıń Yashnabad, Sergeli hám Yangihayot rayonlarınan ótken 23 kilometr aymaǵında bunday joybarlar ámelge asırılsa, jáne 400 isbilermen biznes baslap, 3 mıń jumıs ornın jaratıwı múmkin.

Jerlerdi qurılısqa ruqsat, arxitektura-rejelestiriw tapsırması hám joybarı menen birge tayar paket túrinde aukcionǵa shıǵarıw boyınsha Sergelide jańa tájiriybe baslandı. Mámleketimiz basshısı bul tájiriybeni tek ǵana jer uchastkaları emes, al satıwǵa shıǵarılıp atırǵan mámleketlik obektler hám sanaat zonalarına da engiziw zárúrligin atap ótti.

Tashkent wálayatı aymaǵınan altı jıl aldın Sergelige qosılǵan 13 máhállede 14,5 mıń shańaraq bar, olarda 50 mıńnan aslam xalıq jasaydı. Biraq bul aymaqlardıń xalqı elege shekem qala ortalıǵın tolıq sezgen joq.

Bul máhállelerde jaqtılandırıw ushın 629 temir-beton baǵana ornatılıp, kabel tartılǵan. Biraq sistema ele iske qosılmaǵanı sınǵa alındı. Juwapkerlerge on kún múddette bul máseleni sheshiw tapsırıldı. Sonday-aq, jıldıń aqırına shekem bul máhállelerdi kanalizaciya tarmaǵına tolıq jalǵaw wazıypası qoyıldı.

Sergeli rayonında xalıq hám isbilermenlerdiń sanı artqanı sebepli elektr energiyasına jıllıq talap bes jılda 40 procentke kóbeydi. Ayırım máhállelerde elektr kernewligi normadan 1,5-2 esege tómen ekenligi atap ótildi.

“Qala aldı,” “Ózgeris” hám “Qumariq” podstanciyaların iske qosıw ushın jámi 107 milliard sum ajıratılǵan. Juwapkerlerge bul obektlerdi anıq múddetlerde iske qosıw hám xalıqqa kepillikli elektr támiynatın jolǵa qoyıw wazıypası qoyıldı.

Ulıwma, paytaxttıń Bektemir, Mırza Ulıǵbek, Sergeli, Yashnabad hám Yangihayot rayonlarına ótken 46 máhállede elektr, suw, kanalizaciya hám jol boyınsha birde-bir sheshilmegen másele qalmawı kerek ekenligi atap ótildi.

Sergeli hám Yangihayot rayonlarınıń xalqın qıynap kiyatırǵan jáne bir másele – suw tazalaw imaratı átirapındaǵı jaman iyis. Juwapkerlerge 1-sentyabrge shekem aqaba suw qabıl etiw imaratına zamanagóy filtrlew úskenelerin ornatıp, bul mashqalanı saplastırıw tapsırıldı.

Kelesi jıldan Birlesken Arab Ámirliklerindegi sherikler menen Tómengi Shırshıq rayonında quwatlılıǵı 300 mıń kub metr bolǵan zamanagóy suw tazalaw imaratınıń qurılısı baslanadı. Sonıń esabınan Sergelidegi suw tazalaw imaratına júkleme keskin azayadı.

Usı jılı xalıqqa qolaylıq jaratıw maqsetinde Sergelidegi tiykarǵı 23 kilometr jolda háreket qáwipsizligi qayta kórip shıǵılmaqta. Kesilispelerge 455 “aqıllı” svetofor ornatıladı, 150 avtobus bándirgisi jańalanıp, 10 mıń orınlıq avtomobil turatuǵın orın shólkemlestiriledi.

Kelesi jılı Yangi Sergeli kóshesinde avtobuslar ushın 5,5 kilometrlik BRT jolın qurıw rejelestirilgen. Bul jol Shota Rustaveli kóshesi menen baylanısadı. Sergeli, Bektemir hám Yangihayot rayonların paytaxttıń basqa aymaqları menen baylanıstıratuǵın Tashkent aylanba jolındaǵı jańa kópir qurılısın tezletiw zárúr ekenligi atap ótildi.

Jıl basınan berli Tashkent qalasına derlik 3 million sırt elli turist keldi. Olardıń kópshiligi tariyxıy estelikler, dem alıw baǵları, bazarlar, kafe-restoranlar hám turistlik máhállelerge piyada barıp, arqayın seyil etiwdi qáleydi.

Bunıń ushın jol kórsetkishleri, qolaylı marshrutlar hám sanlı kartalar zárúr ekenligi atap ótildi. Juwapkerlerge avtobus bándirgileri, vokzal, aeroport hám metro stanciyalarında turistler ushın qala marshrutların kórsetetuǵın, telefonǵa biypul hám ańsat júklep alınatuǵın kartalardı engiziw tapsırıldı.

Sonday-aq, paytaxt miymanları hám seyilge shıqqan xalıq ushın hájetxanalardıń jetispeytuǵını atap ótildi. Bir ay múddette ayrıqsha baǵdarlama islep shıǵıp, usı jıldıń ózinde hár bir rayonda 15-20 zamanagóy hájetxana qurıw ushın jerlerdi aukcionǵa shıǵarıw wazıypası qoyıldı. Shıǵındı qutıların keskin kóbeytiw boyınsha da ilajlar kóriledi.

Sergelidegi ayırım mektepler quwatlılıǵınan 1,5-2 esege joqarı júklemede islemekte. Májiliste oqıwshı ornın 2 esege kóbeytiw imkaniyatın beretuǵın jańa tiptegi mektepler qurıw joybarı usınıs etildi.

Jańa joybarǵa bola, sport zalı, asxana hám ustaxana jer tólede jaylasadı, joqarı qabatlardan bolsa klass xanaları sıpatında paydalanıladı. Bıyıl Tashkent qalasınıń hár bir rayonında birewden mektep hám baqshaǵa usı kózqarastı engizip, “paytaxt tájiriybesi”n jaratıw tapsırıldı.

Paytaxtta xalıq hám turistler ushın salqın mikroklimat jaratıw maqsetinde 12 jasalma kól qurıw jumısları baslanbaqta. Sonnan úshewi Sergelide – Qwshqwrǵon, Sultanabad hám Faroǵatlı máhállelerinde jámi 22 gektar maydanda shólkemlestiriledi.

Bul kóllerdi paytaxt klimatın turaqlı saqlawǵa, adamlardıń piyada júrip, dem alıwına xızmet etetuǵın orınlarǵa aylandırıw wazıypası qoyıldı. Sonday-aq, “Jwn” kanalınıń Sergeli hám Yangihayot rayonlarınan ótken 5 kilometr bólegin betonlastırıw baslanǵanı atap ótildi. Sergeli hám Yangihayot rayonlarınıń hákimlerine jıl aqırına shekem kanal boyında seyil etiw ornı hám salamatlıq jolın shólkemlestiriw tapsırıldı.

Májiliste máhállelerde qáwipsiz ortalıqtı támiyinlew boyınsha paytaxt úlgisin jaratıw máselesi de kórip shıǵıldı. Paytaxt rayonlarına respublika basshılarınıń biriktirilgeni óz nátiyjesin berip atırǵanı atap ótildi.

Altı ayda 230 máhállede jınayat júz bermedi, 332 máhállede jınayat keskin azaydı. Kriminogen jaǵday qáweterli máhálleler sanı 60 tan 23 ke tústi. Bul qalada jámiyetlik qáwipsizlikti támiyinlew boyınsha jańa qatnaslar nátiyje berip atırǵanın kórsetpekte.

Sergeli rayonında da qáwipsiz ortalıq jaratıw boyınsha unamlı nátiyjeler atap ótildi. Kriminogen jaǵday awır dep bahalanǵan 29 máhálle “jasıl” kategoriyaǵa ótti. 17 máhállede jınayat júz bermegen. Sergeli bul baǵdarda Tashkent qalası rayonları arasında eń jaqsı nátiyjelerden birin kórsetti.

Mámleketimiz basshısı Ózgeris máhállesindegi profilaktika jumısları boyınsha tájiriybeni ǵalaba en jaydırıw, rayondaǵı qalǵan 46 máhálleni “jasıl” kategoriyaǵa ótkeriw, jasırın ekonomikanı qısqartıw, jaslar menen islesiw boyınsha jańa qatnaslardı engiziw boyınsha juwapkerlerge tapsırmalar berdi.

Májiliste hákimler hám juwapkerlerdiń málimlemesi tıńlandı.