Buxaranıń jańa kelbeti xalıqtıń mápleri jolındaǵı dóretiwshilik baslamalarında kórinbekte

Mámleketimiz basshısı Buxara qalasına saparı dawamında dáslep Buxara wálayatınıń jańa hákimshilik orayında ámelge asırılıp atırǵan dóretiwshilik jumısları menen tanıstı.

Kompleks Qashqadárya wálayatı Kókdala rayonında sınaqtan ótken basqarıw uyımların integraciyalaw tájiriybesiniń dawamı bolıp esaplanadı. Ol jerde 38 mámleketlik uyım bir jerge jámlenip, xalıq ushın úlken qolaylıq jaratılǵan. Burın túrli jumıs penen alıs aralıqlardı basıp, basqa rayonlıq uyımlarǵa qatnaǵan puqaralar barlıq xızmetlerdi ózine jaqın jerde alıw imkaniyatına iye boldı.

Prezidentimiz ótken jılı Kókdalaǵa saparı waqtında bunday qatnas barlıq rayonlar ushın úlgi ekenin atap ótken edi. Ótken dáwirde basqa aymaqlarda da usı tájiriybe tiykarında dóretiwshilik jumısları baslanǵan.

Atap aytqanda, Buxaradaǵı hákimshilik oray 14 gektar maydandı iyelegen bolıp, birinshi basqıshta wálayat hám qala hákimlikleri, wálayatlıq prokuratura jáne ishki isler basqarmaları sıyaqlı mámleketlik uyımlar bir aymaqta jámlengen. Bul, bárinen burın, jergilikli atqarıw hákimiyatı uyımlarınıń óz-ara muwapıqlasıwın jaqsılaw, múrájatlar menen islesiwdi jedellestiriw hám mámleketlik xızmetlerdiń sapasın arttırıwǵa xızmet etedi.

Kompleks tek ǵana hákimshilik imaratlardan ibarat emes. Bul jerde puqaralardıń mazmunlı dem alıwı ushın qıyabanlar, fontanlar hám jasıl aymaqlar qurılmaqta.
Prezidentimiz wálayat hákimliginiń jańa imaratındaǵı qurılıs jumısları menen tanıstı.

Adamlarǵa qolaylıq jaratıw, puqaralar hár qıylı máseleler boyınsha hár qıylı mánzillerge barıp júrmesten, zárúr xızmetlerdi bir aymaqtıń ózinde alıwın támiyinlew maqsetinde mámleketlik uyımlardı birden-bir hákimshilik oraylarǵa birlestiriw jumısların izbe-iz dawam ettiriw zárúrligi atap ótildi.

Usı jerdiń ózinde mámleketimiz basshısına aymaqtı sociallıq-ekonomikalıq rawajlandırıw, xalıqqa jáne de qolaylı sharayatlar jaratıw baǵdarında ámelge asırılıp atırǵan jumıslar tanıstırıldı.
Sonıń ishinde, bankler tárepinen jasalma intellektten paydalanǵan halda aymaq hám máhálleler kesiminde tallaw ótkerilip,

Buxara rayonı mısalında ósiw noqatları anıqlanǵanı haqqında málimleme berildi. Bul tallawlar jer, suw, miynet resursları, bazar talabı, infrastruktura hám bar óndirislik quwatlıqlardı óz-ara baylanıslı halda bahalaw imkaniyatın berdi. Nátiyjede Buxara rayonında agrobiznes, turizm, sanaat hám jol boyı xızmetleri eń perspektivalı baǵdarlar sıpatında belgilengen.

Atap aytqanda, 15 mıń gektar jerdi ózlestiriw, 500 gektar jańa júzim atızların jaratıw, ekoturizmdi keńeytiw, sonday-aq, neft-gaz, ximiya, qurılıs hám azıq-awqat tarmaqlarında jańa joybarlardı ámelge asırıw imkaniyatları kórsetip ótildi. Tallawlar sonı kórsetedi, 2026-2031-jıllarda bul baǵdarlarda 7,4 trillion sumlıq joybarlardı ámelge asırıw hám 15 mıń jańa jumıs ornın jaratıw múmkin.

Sonday-aq, rayondaǵı 36 máhálleni 6 drayver baǵdar – júzim jetistiriw, miywe-ovoщ jetistiriw, sharwashılıq, baǵshılıq, turizm hám serviske qánigelestiriw múmkin ekenligi atap ótildi. Joybarlardı islep shıǵıw hám ámelge asırıwdı jedellestiriw maqsetinde máhálleler ushın resurs bazasın qáliplestiriw, biznes-rejelerdi avtomatikalıq tayarlaw, qarjılardıń háreketin hám nátiyjelerdi real waqıt rejiminde qadaǵalaw boyınsha jasalma intellekt tiykarındaǵı sheshimler islep shıǵılmaqta.

Prezidentimiz jasalma intellekt imkaniyatlarınan paydalanıp, hár bir aymaqtıń potencialın ashıw, joybarlardı nátiyjege qaratılǵan halda qáliplestiriw hám xalıqtıń bántligin jáne dáramatın arttırıwǵa xızmet etetuǵın baslamalardı qollap-quwatlaw áhmiyetli ekenligin atap ótti.

Bunnan soń Prezident Shavkat Mirziyoev Buxaranıń tariyxıy bólegine bardı.
Mámleketimiz basshısı qala xalqın hám miymanların qızǵın qutlıqladı.
Buxaranıń bay mádeniy miyrasın, tariyxıy kelbetin saqlaw hám onı bunnan bılay da abat etiw baǵdarında ámelge asırılıp atırǵan jumıslar haqqında málimleme berildi.

Prezident Shavkat Mirziyoev Buxaraǵa saparı waqtında qalanıń jańa aeroportın qurıw joybarı menen tanıstı.
Mámleketimizde transport infrastrukturası izbe-iz rawajlandırılmaqta. Jańa jol hám kópirler qurılıp, jolawshılarǵa qolaylıqlar arttırılmaqta. Mámleketimiz basshısı 2024-jılı Buxara wálayatına saparı dawamında aymaqtıń turizm potencialın bunnan bılay da rawajlandırıw maqsetinde Buxaranıń jańa xalıqaralıq aeroportın qurıw boyınsha áhmiyetli tapsırma bergen edi.

Bul transport obekti hám oǵan tutas infrastruktura qurıw ushın qala sırtınan jámi 370 gektar jer maydanı ajıratılǵan. Joybar sheńberinde aeroportqa alıp barıwshı avtomobil jolı da qurılmaqta. Onıń ulıwma uzınlıǵı 23,8 kilometrdi qurap, sonnan 2,7 kilometri pútkilley jańa jol, 21,1 kilometri bolsa rekonstrukciyalanadı. Sonday-aq, jol boyında 2 jol ótkel, 9 jer astı piyadalar ótiw ornı hám 8 kópir qurılıwı názerde tutılǵan.

Joybarǵa bola, jańa aeroportta uzınlıǵı 3,3 kilometr bolǵan, barlıq túrdegi hawa kemelerin qabıl etiw imkaniyatına iye ushıw-qonıw jolı, sonday-aq, saatına 1200 jolawshıǵa joqarı dárejede xızmet kórsetiw quwatlılıǵına iye aerovokzal kompleksi qurıladı.
– Biz Buxara wálayatı xalqı, sonday-aq, jergilikli hám sırt elli turistler ushın zamanagóy hám qolaylı xızmet kórsetetuǵın aeroport qurıwdı maqset etkenbiz. Solay eken, bul aeroport jáhán standartları talaplarına tolıq sáykes keliwi shárt, dedi Prezidentimiz.

Mámleketimiz basshısına Buxara wálayatınıń ekonomikalıq, investiciyalıq hám turizm potencialın arttırıwǵa qaratılǵan basqa da qurılıs joybarları haqqında málimleme berildi.

Ózbekstan Respublikası Prezidenti Shavkat Mirziyoevtiń Buxaraǵa saparı dawam etpekte.