Jizzaq jańa ósiw noqatları orayına aylanbaqta

Mámleketimiz basshısı dáslep zamanagóy hám qolaylı jol infrastrukturasın qurıw boyınsha ámelge asırılıp atırǵan jumıslar menen tanıstı.
Wálayat orayın M-39 xalıqaralıq avtomobil jolına baylanıstırıw maqsetinde derlik 290 milliard sum esabınan 700 metrlik jol ótkeli hám 4 kilometrlik jańa avtomobil jolı qurıldı.
Bul jol hár kúni 14 mıńnan aslam transport quralın ótkeriw imkaniyatına iye.
Usı waqıtqa shekem bul jónelisten xalıq qalaǵa kirip-shıǵıw ushın 25 kilometrlik aylanba joldan paydalanıwǵa májbúr edi. Jańa qurılıs sebepli bul aralıq 4 kilometrge shekem qısqardı, eski joldaǵı tıǵılıslar saplastırıldı. Bul tek ǵana aydawshılar emes, al isbilermenler, logistika hám xızmet kórsetiw tarawı ushın da ayrıqsha áhmiyetke iye.
Metall konstrukciyalardan zamanagóy texnologiya tiykarında qurılǵan ótkeldiń xızmet múddeti 100 jıl dep bahalanbaqta. Dástúriy temir-beton ótkeller ádette 50 jıl xızmet etedi. Demek, xızmet múddeti eki esege uzaydı.
Joybardıń jáne bir áhmiyetli tárepi – burın jolawshı hám júk poezdları ótken waqıtta avtomobiller temir jol kesilispesinde toqtap qalıwǵa májbúr edi, endi bolsa jol ótkeli qurılǵanı sebepli tez medicinalıq járdem, órt óshiriw hám basqa da arnawlı xızmetlerdiń háreketi biraz jeńillesedi.
Usı jerdiń ózinde mámleketimiz basshısına atom energetikası joybarlarınıń barısı haqqında málimleme berildi.
Házirgi waqıtta Jizzaq wálayatında integraciyalasqan eki az quwatlıqtaǵı reaktor hám eki úlken reaktordan ibarat atom elektr stanciyasın qurıw baslanǵan.
Házirgi basqıshta reaktor imaratı ushın kotlovan qazıw jumısları jedel basqıshqa kirgen. Qurılıs-montajlaw bazası ushın jer tegislew, betonlaw, armatura ornatıw jumısları orınlanbaqta. Qurılısshılar jasawı ushın waqtınsha turaq jay kompleksi qurılǵan.
Atom elektr stanciyası ushın zárúr qurılıs materialların lokalizaciyalaw, joqarı oqıw orınlarında taraw ushın kadrlar tayarlawdı keńeytiw rejeleri tanıstırıldı.
Bolajaq elektr stanciyasında miynet etetuǵın qánigeler hám olardıń shańaraqları ushın monoqalasha qurıw joybarı haqqında maǵlıwmat berildi. Qalasha AESten 16 kilometr qashıqlıqta jaylasqan, 10 mıń adamǵa mólsherlengen boladı, onda barlıq zárúr infrastruktura, sociallıq hám xızmet kórsetiw obektleri názerde tutıladı.
Prezidentimiz Jizzaq qalasına kiriw bólegin zamanagóy kóriniske keltiriw boyınsha master-reje hám renovaciya joybarlarınıń prezentaciyası menen de tanıstı.
Renovaciya baǵdarlaması tiykarında Jizzaqta eski turaq jaylardıń ornında zamanagóy, qolaylı hám qáwipsiz turaq jaylardıń qurılıwı rejelestirilgen. Sonday-aq, IT-oray imaratın qurıw, ónermentshilik orayın shólkemlestiriw, ayırım bar komplekslerdi rekonstrukciyalaw hám ǵalabalı kóshelerdi tártipke keltiriw sıyaqlı joybarlar menen tanıstı.
– Búgingi Jizzaq – keshegi Jizzaq emes. Wálayattıń potencialı, imkaniyatı esesine arttı, adamlardıń turmısqa, jumısqa múnásibeti túp-tiykarınan ózgerdi. Bul imkaniyatlardı xalıqtıń abadanlıǵın arttırıwǵa xızmet etetuǵın anıq joybarlarǵa aylandırıwımız kerek, -dedi Prezident.
Prezentaciyalar dawamında dodalanǵan máseleler boyınsha juwapkerlerge anıq tapsırmalar berildi.
Mámleketimiz basshısı Jizzaq politexnika institutı janında shólkemlestirilgen Avtomobil qurılısı injenerlik mektebiniń jumısı menen tanıstı.
Bul jerde “BYD Uzbekistan Factory” hám “ADM Jizzakh” kárxanaları menen maman qánigeler tayarlaw hám olardı jumısqa jaylastırıw boyınsha birge islesiw ornatılǵan.
Injenerlik mektebinde transport tarawına qánigelesken tórt bilimlendiriw baǵdarı boyınsha oqıw baǵdarlamaları jańasha qatnas tiykarında shólkemlestirilgen. Atap aytqanda, ekinshi kurstı joqarı nátiyjeler menen tamamlaǵan studentler BYD zavodınıń talapları tiykarında islep shıǵılǵan zamanagóy oqıw platformalarında eki jıllıq dual bilim aladı. Studentler zavod penen tikkeley birge islesiwde ámeliy sabaqlardı da ótip baradı, bul bolsa olarǵa arnawlı jumısqa jollama sertifikatına iye bolıw imkaniyatın beredi.
Qısqa múddetli tayarlaw kurslarında avtomobil zavodına jumısqa kiriwshi talabanlar, zavod jumısshıları hám jumıssız jaslarǵa ózleri qızıqtırǵan kásipler úyretiledi. Bul jerde BYD avtomobil islep shıǵarıw mini konveyeri de shólkemlestirilgen. Óndiris cexında kepserlew, boyaw, jıynaw hám sapa qadaǵalawı bólimleri bar.
Elektromobil hám zaryadlaw stanciyasınıń dúzilisi, elektromobillerge xızmet kórsetiw, sanaat hám baǵdarlamalaw injenerligi, ózine túser bahanı hám revers injenerligi baǵdarlarına qánigelesken arnawlı xanalar shólkemlestirilgen.
Dúnya avtomobil sanaatında bir qaǵıyda bar: básekini talqılamaǵan kompaniya rawajlana almaydı.
Jizzaqtaǵı bul injenerlik mektebinde birinshi márte ónimdi texnikalıq-analitikalıq salıstırıw, qárejetlerdi modellestiriw (cost modeling), óndiristi optimallastırıw, processlerdi globallıq standartlar menen salıstırıw sıyaqlı kónlikpeler de úyretilmekte.
Injenerlik mektebi tek ǵana studentler ushın emes, al tarawda jumıs islew tilegindegi jaslar hám qánigeler ushın da ashıq. Bul jerde mamanlıq arttırıw baǵdarlamaları, baslanǵısh kásiplik tayarlıq kursları hám isbilermenler ushın ámeliy oqıw modulleri shólkemlestirilgen. Olarda aldınǵı qánigeler hám óndiris kárxanalarınıń tájiriybeli injenerleri belsene qatnasadı.
Mekteptiń tiykarǵı maqseti – studentti tayar kadr sıpatında jumıs ornına barıwdan aldın ámeliyat ortalıǵına alıp kiriwden ibarat. Nátiyjede pitkeriwshiler bazar talaplarına tolıq juwap beretuǵın, jetik hám básekige shıdamlı qánigege aylanadı.
Mámleketimiz basshısı mekteptegi sabaqlar procesin baqladı, mini konveyerde islep atırǵan oqıwshılar menen sáwbetlesti.
Prezidentimiz bul jerde respublika hám wálayattıń belsendileri menen de sóylesti.
Keyingi jılları Jizzaqta sanaat, awıl xojalıǵı hám basqa da kóplegen tarawlarda jaqsı nátiyjelerge erisilip atırǵanı atap ótildi. Biraq iske qosılmaǵan imkaniyatlar ele kóp ekenligi aytıldı.
– Jizzaqqa kelip, jańa ósiw noqatların belgilep alıwdı maqset etkenbiz. Tiykarǵısı, xalıq, atap aytqanda, jaslarǵa múnásip sharayat jaratıw, joqarı dáramatlı jumıs penen támiyinlew, – dedi mámleketimiz basshısı.
Prezident Shavkat Mirziyoev jańadan qurılǵan Jizzaq wálayatı kóp tarmaqlı medicina orayına bardı.
Bul kompleks xalıqqa barlıq zárúr medicinalıq xızmetlerdi bir orında kórsetiw imkaniyatın jaratıwı menen úlken áhmiyetke iye. Joybar wálayatta shólkemlestirilip atırǵan medicina klasteriniń dáslepki basqıshı bolıp esaplanadı.
Zamanagóy medicinada bunday klasterli qatnas operativ diagnostika, joqarı texnologiyalı emlew hám emleniwdi qálewshiler ushın byurokratiyalıq processlerdi azaytıwdıń eń nátiyjeli modeli sıpatında tán alınǵan.
Mámleketimiz basshısına mákemeniń imkaniyatları haqqında maǵlıwmat berildi. Prezident nawqaslardı emlew, shıpakerlerdiń nátiyjeli islewi ushın jaratılǵan sharayatlar menen tanıstı.
Oray zamanagóy jeti qabatlı imaratta jaylasqan bolıp, kúnine 400 ge shekem nawqastı qabıllaw quwatlılıǵına iye. 344 stacionar orınǵa iye orayǵa ulıwma bahası 100 milliard sumnan aslam zamanagóy úskeneler – MRT, MSKT, laboratoriya kompleksleri hám joqarı texnologiyalı xirurgiyalıq úskeneler ornatılǵan.
Poliklinika, radiologiya, kardioxirurgiya, neyroxirurgiya, oftalmologiya hám urologiya sıyaqlı bólimlerdiń bir komplekste jaylasqanı medicinalıq xızmet kórsetiwdi jedellestiredi, shıpakerler arasındaǵı birge islesiw hám nawqaslardıń háreketin jeńillestiredi. Ásirese, jańa imkaniyatlar sebepli joqarı texnologiyalı operaciyalar ushın gezeklerdiń qısqarıwı joybardıń eń úlken sociallıq nátiyjesi bolıp esaplanadı.
Oraydıń iske qosılıwı nátiyjesinde Jizzaq xalqınıń respublikalıq emlewxanalarǵa yamasa qońsı wálayatlarǵa qatnawı 75-80 procentke azayadı.
Medicina klasterinde Qazan federal universiteti menen jergilikli qánigeler ushın mamanlıq arttırıw, aldınǵı diagnostika hám emlew usılların engiziw, zamanagóy medicinalıq standartlardı ózlestiriw imkaniyatın beretuǵın uzaq múddetli birge islesiw ornatıladı.
Prezidentimiz densawlıqtı saqlaw sistemasınıń juwapkerleri hám xızmetkerleri menen sóylesti.
Mámleketimiz basshısı medicina klasterleri hám kóp tarmaqlı klinikalardı basqarıwda eski usıllardan shıǵıp, jańa mexanizmlerdi engiziw, sonıń ishinde, medicinanıń hár bir baǵdarı boyınsha sırt elden xalıqaralıq ekspertler hám jetekshi menedjerlerdi tartıp, jergilikli qánigelerdi ózimizde, tikkeley mákemelerde oqıtıw, mamanlıǵın arttırıw, sanlastırıw hám jasalma intellektten paydalanıwdı keńeytiw zárúr ekenligin atap ótti. Bul Jizzaq tájiriybesi bolıwı kerek ekenligi atap ótildi.
Prezidentimiz xalıqtıń medicinalıq xızmetlerden razılıǵı máselesine ayrıqsha toqtap ótti. Tarawda ámelge asırılıp atırǵan hár qanday ózgerislerde, bárinen burın, insan qádiri ústin bolıwı zárúr ekenligi kórsetip ótildi.
– Adamlarımızdı kóbirek imarat, ondaǵı sharayat emes, xızmettiń sapası, shıpakerdiń bilimi, tájiriybesi, hadallıǵı oylandıradı. Emlewxanaǵa kelgen adam, bárinen burın, itibar hám durıs diagnoz, tez hám sapalı emleniwdi qáleydi. Sonıń ushın eń úlken wazıypa – xalıqqa shın kewilden xızmet etetuǵın, joqarı mamanlıq hám kompetenciyaǵa iye bolǵan medicina sistemasın jaratıw bolıp esaplanadı, -dedi mámleketimiz basshısı.
Usı jerdiń ózinde Qazan medicina universitetiniń Jizzaq filialınıń oqıtıwshıları hám studentleri menen sáwbetlesiw bolıp ótti. Oqıw procesinde ámeliy sabaqlardı kóbeytiw, studentlerdi jáhán medicinasınıń jetiskenlikleri hám aldınǵı tájiriybesi menen turaqlı tanıstırıp barıw áhmiyetli ekenligi atap ótildi.
Prezidentimiz Jizzaq wálayatına saparı sheńberinde Sharaf Rashidov rayonındaǵı “Agrooray” awıl xojalıǵı kárxanaları kompleksinde de boldı.
Elimizde awıl xojalıǵın rawajlandırıwǵa qaratılıp atırǵan itibar sebepli tarawda imkaniyatlar keńeyip, zúráátlilikti arttırıwda úlken áhmiyetke iye bolmaqta. Orınlarda agrooraylar shólkemlestirilip, fermer hám diyqanlarǵa kompleksli xızmet kórsetiw jolǵa qoyılmaqta.
Jizzaq wálayatınıń Sharaf Rashidov rayonında da áne usınday oray jumıs basladı.
Orayda ósimliklerdi qorǵaw laboratoriyası, veterinariya dárixanası, agronom másláhát, tuqım hám náller jetkerip beriw, xalıqtıń shańaraqlarına ıssıxanalar qurıw, agromarket dúkánı, mini-texnikalar satıw hám olarǵa xızmet kórsetiw sıyaqlı baǵdarlar bar.
Bul jerde awıl xojalıǵı boyınsha barlıq xızmetler “bir ayna” principi tiykarında jolǵa qoyılǵan. Bir gektar maydandı qamtıp alǵan oraydıń birinshi qabatında ósimliklerdi qorǵaw quralları dúkánı, veterinariya dárixanası, tuqım dúkánı, agromarket, mobil brigada xanaları hám 8 basqa da xızmet bólmeleri jaylasqan.
Ekinshi qabatta ósimliklerdi qorǵaw laboratoriyası bar. Sonday-aq, topıraq hám suw analizi xanası, entomologiya jáne fitopatologiya xanaları shólkemlestirilgen.
Oray aymaǵında wálayatlıq awıl xojalıǵı basqarması, Agrosanaattı rawajlandırıw agentliginiń bólimi, agroinspekciya, tuqımgershilik orayı, qarakólshilik associaciyası hám awıl xojalıǵına xızmet kórsetiwshi basqa da shólkemler jaylasqan.
Mámleketimiz basshısı agrooraydıń jumısı menen tanıstı, oraydıń jumısın bunnan bılay da keńeytiw, qarıydarlarǵa xızmetlerdi kóbeytiw hám awıl xojalıǵında qosımsha qun jaratıw boyınsha usınısların berdi.
Bunnan soń Xalıq deputatları Jizzaq wálayatı Keńesiniń gezeksiz sessiyası bolıp ótti. Onda Ózbekstan Respublikası Prezidenti Shavkat Mirziyoev qatnastı.
– Wálayattı qanday awır sharayatlardan alıp shıqqanımızdı, Jizzaqtıń hár bir rayonında bolıp atırǵan úlken ózgerislerdi, adamlardıń quwanıshın kórip, oǵada quwanıshlıman hám maqtanaman, – dedi mámleketimiz basshısı sóziniń aldında.
Ótken dáwirde Jizzaq wálayatı respublikadaǵı sanaatı eń tez ósip atırǵan aymaqqa aylandı. Segiz jılda 6,5 milliard dollarlıq investiciyalıq joybarlar iske qosılǵan bolsa, sonıń 45 procenti sanaat úlesine tuwra keledi. Jizzaqta jılına 175 mıń avtomobil islep shıǵarıw quwatlıqları jaratıldı.
Qısqa waqıt ishinde Zomin, Forish, Arnasay rayonları hám Jizzaq qalasında 2 milliard dollarlıq 500 den aslam turizm hám servis obektleri jumıs basladı. Arnasay hám Zominde 300 million dollar esabınan 12 ay dawamında tolıq isleytuǵın kurort zonaları iske qosılǵanı, olarda aeroportlar qurılǵanı nátiyjesinde Jizzaq eń tartımlı turistlik marshrutlardan birine aylandı.
Segiz jıl aldın Jizzaqtaǵı jumıs orınlarınıń 42 procenti awıl xojalıǵına tuwra kelgen bolsa, búgin 310 mıńǵa shamalas wálayat xalqı sanaat hám servis tarawlarında joqarı dáramatlı jumıslar menen bánt.
Paxtashılıqqa beyimlesken wálayattıń awıl xojalıǵı da túp-tiykarınan diversifikaciyalandı. Baxmal, Ǵállearal, Zomin, Yangiobod, Forish rayonları baǵshılıqqa qánigelesip, 28 mıń gektar jańa baǵ hám júzim atızları jaratıldı. Mırzashól, Doslıq, Zafarobod, Zarbdor, Paxtakor, Arnasaydıń shól aymaqlarında 12 mıń gektar jerlerde de baǵ hám ovoщ plantaciyaları shólkemlestirildi.
Ulıwma, sońǵı segiz jılda Jizzaqta sanaat 2,5 trillion sumnan 25 trillion sumǵa, xızmetler 2,5 trillion sumnan 20 trillionǵa, awıl xojalıǵı 9 trillion sumnan 30 trillion sumǵa artqanı atap ótildi.
– Álbette, bul – úlken reformalarımızdıń baslanıwı. Jizzaq wálayatın sociallıq-ekonomikalıq rawajlandırıw jolında ele kóp jumıslardı islewimiz zárúr, – dedi Prezidentimiz.
Sessiyada shólkemlestiriw máselesi kórip shıǵıldı.
Prezidentimiz Jizzaq wálayatı hákimi lawazımına hákim wazıypasın atqarıp kiyatırǵan Uluǵbek Mustafoevtıń kandidaturasın alǵa qoydı. Dawıs beriw nátiyjelerine bola, Uluǵbek Mustafoev Jizzaq wálayatınıń hákimi etip tastıyıqlandı.
Mámleketimiz basshısı sanaat, investiciya, turizm, awıl xojalıǵı, qurılıs hám infrastruktura tarawların rawajlandırıw boyınsha jańa baslamalardı alǵa qoydı.
Jizzaqtıń respublika avtomobil qurılısı sanaatındaǵı úlesi 25 procentke jetken. Gezektegi wazıypa zavodlar átirapındaǵı túrles tarmaqlardı rawajlandırıp, lokalizaciyalaw dárejesin arttırıw hám ózine túser bahanı azaytıwdan ibarat ekeni atap ótildi.
Isbilermenlerge qolaylı shártlerde tayar imaratlardı usınıs etiw, komplektlewshi bóleklerdi validraciyalaw qárejetleriniń 50 procentin qaplap beriw wazıypaları belgilep alındı.
Wálayatta jılına 1 mıń tonna volfram qazıp alıw joybarı ámelge asırılmaqta. Ǵállearal hám Nurabadtaǵı joybarlar iske qosılsa, Ózbekstan volfram islep shıǵarıw boyınsha jetekshi mámleketlerden birine aylanatuǵını atap ótildi.
Juwapkerlerge Ǵállearaldaǵı altın resursına iye perspektivalı maydanǵa investor tartıw, Forishtegi qorǵasın-cink káninde geologiyalıq-izlew jumısların juwmaqlap, Arnasaydaǵı uran rezervi anıqlanǵan kánniń texnikalıq-ekonomikalıq tiykarın juwmaqlaw tapsırıldı.
“Jizzaq” erkin ekonomikalıq zonasındaǵı 510 million dollarlıq 30 joybar esabınan 10 mıńǵa shamalas adamnıń bántligi támiyinlendi. Bul jerde jáne 540 million dollarlıq joybarlar jedel ketpekte.
Isbilermenler jańa joybarlar ushın sanaat zonasın jeterli quwatlılıqta elektr menen támiyinlew hám suw tazalaw imaratın qurıp beriwdi soramaqta.
Energetika ministrligine bul jerge 40 kilometr joqarı kúshleniwli tarmaq tartıp kelip, 40 megavattlı podstanciya qurıw tapsırıldı. 2026-jıl sanaat zonaları infrastrukturasın rawajlandırıw baǵdarlamasında “Jizzaq” erkin ekonomikalıq zonasında suw tazalaw imaratın qurıw ushın 100 milliard sum názerde tutıladı.
Sanaattıń energiya menen támiyinleniw dárejesin arttırıw ushın usı jılı 200 megavatt, kelesi jılı 300 megavattlı quwatlıqlar jaratıladı. Oǵan qosımsha 30 megavattlı 150 kishi hám mini GESler iske qosıladı.
Wálayatta infrastrukturanı jaqsılaw hám isbilermenlikti rawajlandırıw ushın kelesi jılı derlik 10 trillion sum resurs beriletuǵını járiyalandı.
Baxmal hám Zomin rayonlarındaǵı tawlı aymaqlardı birden-bir turizm aylanasına birlestiriw arqalı júzlegen servis obektlerin iske qosıw, mıńlaǵan adamlardı jumıs penen támiyinlew, turizm eksportın esesine arttırıw múmkin ekenligi atap ótildi.
Juwapkerlerge kelesi jılı “Zomin – Baxmal – Ǵállearal” jolınıń 158 kilometr bólegin ońlawdı baslaw tapsırıldı. Baxmal rayonında 39 gektar maydanda 40 million dollar investiciya esabınan turizm klasterin shólkemlestiriw baslaması maqullandı. Baxmalǵa da “turizm rayonı” statusı beriletuǵını belgilendi.
Arnasay aeroportında úlken samolyotlardı da qabıl etiw imkaniyatın jaratıw zárúr ekenligi atap ótildi. Bunnan tısqarı, Aydar-Arnasay kóline shekem temir jol da alıp kelinedi.
Prezidentimiz awıl xojalıǵına ayrıqsha itibar qarattı.
Wálayattaǵı jámi 900 mıń gektar suwǵarılmaytuǵın hám jaylaw jerlerdiń 110 mıń gektarı rezervte turǵanı, olarda ot-jem, maylı eginler egiw hám sanaat baǵların jaratıw arqalı keminde 20 mıń adamdı jumıs penen támiyinlew múmkin ekenligi atap ótildi.
Sonday-aq, wálayattaǵı kóplegen sharwa hám fermerler ot-jem jáne miywe-ovoщ jetistiriwde suw nasosına jumsalǵan elektr ushın subsidiyanı hár aydıń basında tólep beriwdi soraǵan. Juwapkerlerge pútkil respublikada bul subsidiyalardı aydıń basında beretuǵın sistema jaratıw áhmiyetli ekeni kórsetip ótildi.
Kartoshka jetistiriwdi rawajlandırıw baǵdarında Jizzaq wálayatı úlgi bolıwı kerek ekenligi atap ótildi. 2026-jıldan baslap kartoshka jetistiriwshilerdi qollap-quwatlawdıń jańa mexanizmleri engiziletuǵını belgilendi.
Onda mineral tógin, texnika, janılǵı hám basqa da qárejetler ushın 6 aylıq jeńilletilgen dáwir menen bir jıl múddetke 12 procentlik kredit ajıratıladı. Kreditlerdiń 50 procentke shekemgi bólegine kepillik beriledi, suwǵarıw nasoslarına quyash panelin ornatıw qárejetiniń yarımı qaplap beriledi.
Kelesi jıldan suwǵarıw nasoslarınıń elektr qárejetiniń 50 procenti qaplap beriledi, shetten alıp kelingen kartoshka egiw hám jıynaw texnikaları bajıxana bajılarınan azat etiledi.
Sonıń menen birge, superelita hám elita tuqımların fermerlerge jetkerip beriwge shekemgi dáwirde muzlatqıshlı qoymaxanalarda saqlaw qárejetiniń 50 procentin qaplap beriw mexanizmi engiziledi.
Bunnan tısqarı, Baxmaldaǵı baǵshılıq xojalıqları ushın bir qatar jańalıqlar járiyalandı. Atap aytqanda, intensiv baǵ shólkemlestiriwde 7 jıl múddetke 3 jıl jeńilletilgen dáwir menen 14 procentten kredit beriledi. Miyweniń túrine qarap, shpalerler ushın 20 mıń sumnan 70 mıń sumǵa shekem subsidiya ajıratıladı.
Sonday-aq, muzlatqıshlı qoymaxanalar ushın kredit procentiniń tiykarǵı stavkadan artqan 8 procentke shekemgi bólegi qaplap beriledi. Miywe-ovoщ eksportshıları hám baǵmanlarǵa da qadaqlaw qárejetleriniń 50 procentin qaplaw ushın subsidiya tólenedi.
Ulıwma, kelesi jılı baǵshılıq boyınsha Baxmalda tájiriybe mektebi jaratılıp, bul jeńillikler pútkil respublikamızda engiziledi.
AQShlı sherikler menen Zominde qusshılıq boyınsha iri násilshilik kárxanası shólkemlestirilmekte. Bul klasterde 100 mıń bas quwatlılıqtaǵı birinshi násilli ana tawıq hám 9 million dana inkubaciyalıq máyek islep shıǵarıw jolǵa qoyıladı. Bul siyrek ushırasatuǵın joybar respublikada qusshılıqtı jańa basqıshqa alıp shıǵıwǵa xızmet etedi.
Qurılıs hám infrastruktura máseleleri dodalanıp, sociallıq xızmetler, miynet bazarı hám infrastrukturanı oraydan uzaq máhálleler xalqına jaqınlastırıw zárúr ekenligi atap ótildi.
Urbanizaciya milliy komiteti hám wálayat hákimligine Evropadan qánigelerdi tartıp, Jizzaq qalası hám Sharaf Rashidov rayonın birden-bir aglomeraciya tiykarında rawajlandırıw boyınsha master-reje islep shıǵıw tapsırıldı.
Wálayat xalqınıń talap hám tileklerin esapqa alıp, Jizzaq qalasındaǵı tıǵılıstı saplastırıw ushın 10 kilometrlik aylanba jol qurıladı. Sonday-aq, Dashtobod qalashası hám Xovos rayonı arasındaǵı temir jol ústinde de jańa kópir qurılısı baslandı.
– Búgin sizler menen wálayattı sociallıq-ekonomikalıq rawajlandırıw boyınsha aldımızda turǵan jańa wazıypalardı belgilep, tiykarǵı máselelerdi dodalap aldıq. Bul háreketler hám qabıl etip atırǵan qararlarımızdan maqset bir – usı jerde jasap, miynet etip atırǵan adamlardı razı etiw, wálayattı hár tárepleme rawajlanǵan aymaqqa aylandırıw, – dedi mámleketimiz basshısı májilis juwmaǵında.
Sessiya dawamında wálayat hám rayon hákimleriniń esabatları, belsendilerdiń pikirleri tıńlandı.
Prezident Shavkat Mirziyoev Jizzaq qalasında jaylasqan “Kók saray” sawda hám xızmet kórsetiw kompleksiniń jumısı menen de tanıstı.
Elimizde sawda tarawında zamanagóy xızmetler kórsetiw, kishi biznes hám isbilermenlik jumısı ushın qolaylı sharayat jaratıw boyınsha keń kólemli jumıslar ámelge asırılmaqta.
Jizzaq qalasındaǵı 3,5 gektar maydanda jumıs alıp barıp atırǵan “Kók saray” kompleksi sawda hám turmıslıq xızmet tarawında wálayattaǵı eń iri obektlerden biri bolıp esaplanadı.
Bul jerde 300 den aslam jańa isbilermenlik subektleri jumıs baslaǵan. Nátiyjede 800 den aslam jumıs ornı jaratıldı, sonıń ishinde, járdemge mútáj kategoriyadaǵı 100 puqara jumıs penen támiyinlendi.

Komplekste iri sawda tarmaqlarınıń filialları, 10 iri jergilikli hám sırt el brendleri islemekte, 250 sawda dúkánı, fud-kort hám balalar maydanshası jaylasqan. Kórsetilgen xızmetlerdiń kólemi jılına 223 milliard sumdı quramaqta.
Itibarlı tárepi, komplekste kitapxana hám kitap dúkánı da shólkemlestirilgen.
Joybardıń ekinshi basqıshı sıpatında mıń sawda shaqapshasın óz ishine alǵan, awıl xojalıǵı ónimlerine qánigelesken úsh qabatlı “Ekobazar”dıń qurılısı rejelestirilgen. Nátiyjede 2 mıń jańa jumıs ornı jaratıladı.
Prezidentimiz komplekstiń jumısı menen tanısıp, kelgenler menen qızǵın sóylesti. Xızmetlerdi kompleksli qatnas tiykarında jáne de rawajlandırıw, bunday oraylardı basqa aymaqlarda da kóbeytiw zárúrligin atap ótti.
Sonıń menen mámleketimiz basshısınıń Jizzaq wálayatına saparı juwmaqlandı.