Yoshlar uchun yer ajratish dasturi natijalari
2025-11-01 18:00:00 / Yangiliklar
Yurtimizda yoshlarga o‘z mehnati orqali daromad topish, qishloq xo‘jaligi bilan shug‘ullanish va tadbirkorlikni rivojlantirish uchun keng imkoniyatlar yaratilmoqda. Shu maqsadda amalga oshirilayotgan “Yoshlar uchun yer ajratish” tashabbusi doirasida sezilarli natijalarga erishildi.
Bugungi kunga qadar 155,2 ming nafar yoshga jami 57,1 ming gektar yer maydoni ajratildi. Ushbu tashabbus orqali yoshlar o‘z mustaqil faoliyatini boshlash, oilaviy farovonlikni ta’minlash va mahalliy iqtisodiyot rivojiga hissa qo‘shish imkoniga ega bo‘lishdi.
Ajratilgan yerlarda 522 ming tonnadan ortiq mahsulot yetishtirilib, jami 1,9 trillion so‘mlik daromad olindi.
Shundan:
236,6 ming tonna – don va dukkakli ekinlar,
178,4 ming tonna – poliz ekinlari,
107,5 ming tonna – bog‘dorchilik mahsulotlarini tashkil etdi.
Bu mahsulotlar orqali mos ravishda 529 milliard, 395 milliard va 171 milliard so‘mlik iqtisodiy qiymat yaratildi.
Shuningdek, “Yosh fermerlar” platformasi orqali yoshlarning faoliyati muvofiqlashtirilmoqda, ularga agrotexnik maslahatlar, kredit va marketing bo‘yicha amaliy ko‘mak ko‘rsatilmoqda.
Bugungi kunda Davlatimiz rahbari tomonidan tasdiqlangan PQ 153-son qaroriga asosan 33 ta yoshlar kooperatsiyasi faoliyat yuritmoqda, yana 26 tasi tashkil etilish jarayonida. Ushbu kooperatsiyalar nafaqat ishlab chiqarish, balki bandlik, ta’lim va iqtisodiy o‘sishning yangi manbai sifatida shakllanmoqda.