O‘zbеkistоn Rеspublikаsi Yoshlar ishlari agentligi

Namangan viloyatida “Besh tashabbus olimpiadasi” doirasidagi futbol va mini-futbol bo‘yicha Davlat xavfsizlik xizmati kubogi musobaqasining viloyat bosqichi bellashuvlari yakunlandi. Mahalla yoshlari o‘rtasida iste’dodlarni aniqlash, sportni ommalashtirish va do‘stona muhitni mustahkamlashga xizmat qilayotgan mazkur loyiha bu yil ham yuqori saviyada kechdi.

Musobaqaning hal qiluvchi final bahslari “Markaziy” stadionida bo‘lib o‘tdi. Futbol oqshomiga aylangan ushbu yakuniy uchrashuvlarda Yangiqo‘rg‘on tumanining “Yuqori Navkent” jamoasi Kosonsoy tumanining “Olmazor” jamoasiga qarshi bahs olib bordi. Murosasiz kechgan o‘yinda “Yuqori Navkent” jamoasi 3:1 hisobida g‘alaba qozonib, viloyat bosqichi chempioni unvonini qo‘lga kiritdi.

Taqdirlash marosimida viloyat hokimi Shavkatjon Abdurazzoqov g‘olib va sovrindorlarni qutladi hamda ularning kelgusida respublika bosqichidagi ishtirokiga omad tiladi.

◀️ Yakuniy natijalarga ko‘ra:

Futbol yo‘nalishida – Yangiqo‘rg‘on tumanining “Yuqori Navkent” mahallasi jamoasi,

Mini-futbol bo‘yicha – To‘raqo‘rg‘on tumanining “Naymancha” mahallasi jamoasi,

Qizlar o‘rtasidagi musobaqada – Namangan tumanining “Qo‘qon Qishloq” mahallasi jamoasi 1-o‘rinni egalladi.

🏆 G‘olib jamoalar tashkilotchilar tomonidan medal, diplom, kubok va esdalik sovg‘alari bilan taqdirlandilar.

Yoshlar o‘rtasida nafaqat sportni ommalashtirish, balki ular orasida do‘stona muhitni qaror toptirish maqsadiga qaratilgan loyiha doirasida o‘g‘il – qizlar unutilmas san’at oqshomiga ham guvoh bo‘lishdi. Bu o‘z navbatida ularning shijoat va g‘ayratini oshirishda muhim vosita bo‘ldi.

Ta’kidlash lozimki, joriy yilda DXX kubogi musobaqalariga viloyatning barcha tuman va shaharlaridan jami 65 038 nafar sportsevar o‘g‘il-qizlar qamrab olindi.