O‘zbеkistоn Rеspublikаsi Yoshlar ishlari agentligi

 

2025-yil 14-fevral kuni Davlatimiz rahbari raisligida o‘tkazilgan yoshlar bilan ochiq muloqotda belgilangan vazifalardan kelib chiqib, yoshlarni harbiy-vatanparvarlik ruhida tarbiyalash va harbiy xizmatga bo‘lgan qiziqishini oshirish maqsadida “Shijoat va g‘ayrat” harbiy-sport musobaqasi yo‘lga qo‘yildi.

 

Musobaqani O‘zbekiston Mahallalari uyushmasi, Yoshlar ishlari agentligi, Davlat xavfsizlik xizmati, Mudofaa va Sport vazirliklari hamkorlikda “mahalla – tuman (shahar) – hudud – respublika” bosqichlarida tashkil etdi.

 

Musobaqada har bir mahalladan 8 nafar o‘g‘il bola va 2 nafar qizdan iborat 18–22 yoshdagi jamoalar shakllantirildi. Ishtirokchilar quyidagi 7 ta shart bo‘yicha bellashdi: turnikda tortilish, press, granata uloqtirish, qisqa va uzoq masofaga yugurish, AK-74 avtomatini qismlarga ajratish va yig‘ish, pnevmatik quroldan otish.

 

2025-yil 26-iyun kuni Qoraqalpog‘iston Respublikasi, viloyatlar va Toshkent shahridan saralangan 14 ta jamoa (140 nafar ishtirokchi) musobaqaning respublika final bosqichida qatnashish uchun Toshkentga yetib keldi.

 

Ishtirokchilar tantanali kutib olinib, Mudofaa vazirligiga qarashli Madaniyat va ma’rifat departamentida bo‘lib o‘tgan ochilish marosimida qatnashdilar. Marosimda tashkilotchilar ishtirokchilarga omad va muvaffaqiyat tilab chiqish qildilar.

 

Shundan so‘ng, ishtirokchilar Mudofaa vazirligining harbiy orkestri sadolari ostida “G‘alaba” bog‘idagi “Matonat madhiyasi” yodgorligi poyiga gul qo‘ydilar.

 

Bellashuvlar 7 ta shart asosida bo‘lib o‘tdi va ularni malakali hakamlar hay‘ati adolatli baholadi.

 

Musobaqa natijalariga ko‘ra:

 

1-o‘rin: Toshkent shahri, Mirzo Ulug‘bek tumani “Jasorat” mahallasi jamoasi,

2-o‘rin: Samarqand viloyati, Kattaqo‘rg‘on tumani “Sho‘rak” mahallasi jamoasi,

3-o‘rin: Toshkent viloyati, Angren shahri “Gulbog‘” mahallasi jamoasi egalladi.

 

Musobaqaning final bosqichi yopilish va taqdirlash marosimi Mudofaa vazirligining dala o‘quv-maydonida bo‘lib o‘tdi. Unda Mudofaa vaziri o‘rinbosari H. Karshiyev, Yoshlar ishlari agentligi direktori o‘rinbosari A. Muminov, FVV o‘rinbosari N. Qodirov, Milliy gvardiya qo‘mondonining o‘rinbosari S. Mamayusupov, Sport vaziri maslahatchisi Sh. Momindjanov, Mahallalar uyushmasi vakillari hamda Davlat xavfsizlik xizmati mas’ullari qatnashdi.

 

Marosimda harbiy vertolyotlarning namoyishlari, qo‘l jangi ko‘rgazmalari, avtomobilni qismlarga ajratib yig‘ish mashg‘ulotlari, qurol-aslaha ko‘rgazmalari, harbiy orkestr va estradachilar chiqishlari katta taassurot qoldirdi.

 

G‘olib jamoalar quyidagicha taqdirlandi:

 

Mahallalar uyushmasi tomonidan qimmatbaho sovg‘alar, Yoshlar ishlari agentligi tomonidan pul mukofotlari:

 

1-o‘rin: 100 million so‘m;

2-o‘rin: 75 million so‘m;

3-o‘rin: 50 million so‘m.

 

Bundan tashqari, g‘olib jamoalar mahallalariga Sport vazirligi tomonidan sport inshootlari qurib beriladi:

 

1-o‘rin: universal sport maydonchasi

2-o‘rin: street workout maydonchasi

3-o‘rin: workout maydonchasi

 

Eng yuqori natija ko‘rsatgan yoshlarga Mudofaa vazirligi tomonidan oliy harbiy ta’lim muassasalariga tavsiyanomalar beriladi.

 

7 ta nominatsiya g‘oliblari, faol mahalla yoshlari yetakchilari ham qimmatbaho sovg‘alar bilan taqdirlandi.

 

Barcha ishtirokchi jamoalarga 30 mln so‘m pul mukofoti bilan taqdirlandi.

 

Musobaqa davomida 244 ming yosh orasidan 39 ming nafar eng kuchli, sog‘lom va tayyor yigit-qizlar harbiy xizmat rezerviga tanlab olindi.

 

Xulosa qilib aytganda, ushbu musobaqa orqali yoshlarni harbiy xizmatga qiziqtirish, Vatanga sadoqat va g‘urur tuyg‘ularini shakllantirish, sog‘lom, kuchli va shijoatli yoshlarni aniqlab, rag‘batlantirish yo‘nalishida muhim qadamlarga erishildi.