Orolbo‘yida xalqaro yoshlar tashabbuslari
2025-05-19 10:00:00 / Yangiliklar
“Green Spark” startaplari hamda “Yoshlar va iqlim” xalqaro tanlovlari doirasida yoshlar ekologik platformalar yaratish, o‘simliklar ekish, raqamli o‘yinlar ishlab chiqish va innovatsion yechimlar bo‘yicha o‘zaro bellashdi. Bellashuv yakunida eng ilg‘or g‘oyalar egalari g‘olib deb topilib, munosib taqdirlandi.
“Yoshlar va Orol dengizini asrash” mavzusidagi yalpi majlis esa Orolbo‘yi muammosi doirasida xalqaro muloqot va hamkorlikni mustahkamlashga xizmat qildi. Unda yoshlar o‘zaro fikr almashdi, iqlim o‘zgarishi bilan bog‘liq muammolarni birgalikda muhokama qildi va ilmiy-amaliy yechimlar izlandi.
Ishtirokchilar Mo‘ynoqdagi Ekologiya muzeyiga tashrif buyurdi, “Kemalar qabristoni”ni ko‘zdan kechirdi va hudud yoshlarining tashabbusi bilan barpo etilgan saksovulzorlar bilan tanishdi.
Ushbu tashrif nafaqat bilim va tajriba almashinuvi, balki do‘stlik, birdamlik va ekologik mas’uliyatni chuqur his etishga turtki bo‘ldi.