O‘zbеkistоn Rеspublikаsi Yoshlar ishlari agentligi

Xabar berganimizdek, O‘zbekiston yoshlar delegatsiyasi AQShga safari davomida Silikon vodiysidagi nufuzli kompaniyalar va universitetlar bilan mamlakatimiz yoshlari uchun manfaatli samarali uchrashuvlar o‘tkazdi. Muloqotlar nafaqat bilim almashinuvi, balki kelajakdagi yirik tashabbuslarga asos bo‘ladigan kelishuvlar bilan yakunlandi.

“500 Global” kompaniyasining dastur menejeri Ella Shukho bilan muloqot davomida Yevrosiyo mintaqasidagi faoliyat, O‘zbekistondagi startaplarni qo‘llab-quvvatlash tashabbuslari va venchur kompaniyalar bilan hamkorlik istiqbollari muhokama qilindi. Natijada, “Yoshlar Ventures” va “500 Global” o‘rtasida strategik aloqalarni yo‘lga qo‘yish rejalashtirildi.

“Silkroad Innovation Hub” kompaniyasi Markaziy Osiyo uchun mo‘ljallangan “Silikon vodiysi amaliyot dasturi”ni taqdim etdi. Unga ko‘ra, o‘zbekistonlik maktab o‘quvchilari o‘rtasida startaplar chempionati o‘tkazilib, g‘oliblar Kaliforniyada 1 oylik maxsus dasturda ishtirok etadi. Delegatsiya ushbu tashabbusni takomillashtirish bo‘yicha takliflar berdi.

Stanford universitetida, taniqli olim va “Venture Mindset” kitobi muallifi Ilya Strebulayev bilan uchrashuv bo‘lib o‘tdi. U O‘zbekistondagi startaplar rivoji va venchur fondlar ekotizimi bo‘yicha qimmatli maslahatlar berdi.

Safarning yakuniy nuqtasi — “Plug and Play” kompaniyasi bo‘ldi. Kompaniya asoschisi Saed Amini va vitse-prezident Emeri Han bilan uchrashuvda kompaniyaning global muvaffaqiyatlari, O‘zbekistondagi filial faoliyati hamda “Yoshlar Ventures” bilan hamkorlik imkoniyatlari muhokama qilindi. E.Hanning O‘zbekistonga tashrifi yuzasidan kelishuvga erishildi.

Mazkur uchrashuvlar yoshlar tashabbuslarini global darajaga olib chiqish yo‘lidagi muhim qadam bo‘ldi.