O‘zbеkistоn Rеspublikаsi Yoshlar ishlari agentligi

AQShga xizmat safari doirasida O‘zbekiston yoshlar delegatsiyasi Kaliforniya shtatining Palo Alto shahrida joylashgan, dunyodagi yetakchi onlayn ta’lim platformalaridan biri — Coursera Inc kompaniyasi vakillari bilan rasmiy uchrashuv o‘tkazdi.

Muloqot Coursera’ning Enterprise yo‘nalishi bo‘yicha vitse-prezidenti Karine Allouche Salanon bilan bo‘lib o‘tdi. Uchrashuvda O‘zbekiston yoshlarini global raqamli bilimlar tizimiga integratsiya qilish, zamonaviy ko‘nikmalarni rivojlantirish, onlayn kurslar orqali kasbiy malaka va raqobatbardoshlikni oshirish, ta’limni mehnat bozori talablariga uyg‘unlashtirish masalalari muhokama qilindi.

Tomonlar O‘zbekiston va Coursera o‘rtasida ta’lim sohasidagi strategik hamkorlikni kuchaytirish, yoshlarni sifatli ta’lim resurslariga jalb etish hamda ularning bandligini ta’minlash yuzasidan fikr almashdi.

Ta’kidlash joizki, O‘zbekiston Respublikasi Raqamli texnologiyalar vazirligi va IT ta’lim uyushmasi tomonidan Coursera bilan hamkorlikda yoshlar uchun manfaatli loyihalar samarali amalga oshirilmoqda.