O‘zbеkistоn Rеspublikаsi Yoshlar ishlari agentligi

Bugun Yoshlar ishlari agentligi binosida “Yoshlar orasida giyohvandlik vositalari va psixotrop moddalar tarqalishining oldini olish kompleks tezkor-profilaktik oyligi”ga bag‘ishlangan matbuot anjumani bo‘lib o‘tdi. Tadbir Ichki ishlar vazirligi, Narkotiklarni nazorat qilish milliy markazi va Yoshlar ishlari agentligi hamkorligida tashkil etildi.

Tadbirda davlat idoralari mutasaddilari, faol yoshlar hamda xalqaro tashkilot vakillari ishtirok etib, giyohvandlik va narkojinoyatlarga qarshi kurash masalalari muhokama qilindi.

Giyohvandlik vositalarining noqonuniy muomalasi nafaqat milliy, balki global miqyosda xavfsizlik va barqarorlikka jiddiy tahdid soladi. Ushbu jinoyatchilik:

• jamiyatda qonuniylikni ta’minlashga to‘sqinlik qiladi;
• iqtisodiy va ijtimoiy rivojlanishga zarar yetkazadi;
• ayniqsa yoshlar orasida tarqalib, ularning hayotini izdan chiqaradi va kelajagiga jiddiy xavf tug‘diradi.

Matbuot anjumanida mutaxassislar yoshlarni giyohvandlikning salbiy oqibatlaridan ogohlantirish, uni oldini olish bo‘yicha amalga oshirilayotgan ishlar haqida batafsil ma’lumot berishdi.

Oylik doirasidagi tadbirlar:

Giyohvandlikka qarshi kurashish faqat huquqni muhofaza qiluvchi organlarning emas, balki butun jamiyatning e’tibor markazida bo‘lishi lozim. Shu bois, oylik doirasida respublika miqyosida keng qamrovli tadbirlar tashkil etilishi rejalashtirilgan.

Xususan:

“Biz hayotni tanlaymiz!” shiori ostida yoshlar uchun turli tadbirlar:

🔹 Marafon, chellenjlar, tasviriy san’at va teatrlashtirilgan chiqishlar;

🔹 Sport musobaqalari va ijodiy ishlar tanlovlari;

🔹 Jamoat joylari va mahallalarda targ‘ibot-tashviqot tadbirlari.

Giyohvandlikning zararli oqibatlarini tushuntirish maqsadida ijtimoiy tarmoqlarda yoshlar orasida ommabop bo‘lgan videoroliklar va qisqa metrajli filmlar muntazam joylashtirib boriladi.

Tadbir davomida soha mutaxassislari yoshlar o‘rtasida giyohvandlikning oldini olishda ota-onalar, o‘qituvchilar va mahalla yetakchilarining roli juda muhim ekanini ta’kidlashdi. Shuningdek, ishtirokchilar va OAV vakillari tomonidan berilgan savollarga batafsil javob berildi.