“O‘zbek tili – qalbim tarjimoni” tanlovi g‘oliblari aniqlandi
2024-10-18 13:30:00 / Yangiliklar
Oliy ta’lim, fan va innovatsiyalar vazirligi, Yoshlar ishlari agentligi, Respublika Ma’naviyat va ma’rifat markazi va Yozuvchilar uyushmasi bilan hamkorlikda mamlakatimiz oliy ta’lim muassasalarida tahsil olayotgan ona tili o‘zbek tili bo‘lmagan xorijlik talabalar o‘rtasida “O‘zbek tili – qalbim tarjimoni” respublika ko‘rik-tanlovi tashkil etildi.
Tanlov 3 bosqichda tashkil etilib, unda faqat kunduzgi ta’lim shaklida tahsil olayotgan talabalar ishtirok etdi.
Ko‘rik-tanlovning saralash bosqichida oliy ta’lim muassasalaridan tavsiya qilingan xorijlik talabalarining ishlari (1-bosqichda yozgan esse va o‘zini tanishtirish bo‘yicha videolavha) Tashkiliy qo‘mita tomonidan ko‘rib chiqildi va eng yuqori ball to‘plagan 15 nafar ishtirokchi respublika bosqichiga tavsiya etildi.
Tanlovning Respublika bosqichi g‘oliblarini taqdirlash marosimida Oliy ta’lim, fan va innovatsiyalar vazirligi hamda Vazirlar Mahkamasining Davlat tilini rivojlantirish departamenti ishtirok etib, o‘zbek tilining davlat tili sifatidagi nufuzini mustahkamlash, xalqaro miqyosdagi mavqesini oshirish, milliy tilimiz va madaniyatimizni targ‘ib qilish bo‘yicha fikrlarini bildirib o‘tdilar. Shundan so‘ng final bosqichining “Erkin mavzuda badiiy chiqish” sharti bo‘yicha ishtirokchilar tomonidan tayyorlangan o‘zbek tilidagi she’r va qo‘shiqlar tinglandi. Ta’kidlash joizki, xorijlik talabalarning tilimiz jilosini madh etuvchi chiqishlari davlat tilimizga hurmatning o‘ziga xos ifodasi bo‘ldi. Yakuniy natijalarga ko‘ra, tanlov g‘oliblari bilan tanishing:
1-o‘rin: Rinka Yagane (Yaponiya) Toshkent davlat sharqshunoslik universiteti talabasi;
2-o‘rin: Emodi Nesar Ahmad (Afg‘oniston) Termiz davlat universiteti talabasi;
3-o‘rin: Vang Chao Yuan (Xitoy) Toshkent axborot texnologiyalari universiteti talabasi.
Eslatib o‘tamiz, tanlov g‘oliblari mos ravishda diplom va bazaviy hisoblash miqdorining 40, 30 va 20 barobari miqdorida pul mukofotlari, faol ishtirokchilar esa sertifikat va esdalik sovg‘alari bilan taqdirlandi.