O‘zbеkistоn Rеspublikаsi Yoshlar ishlari agentligi

Bugun poytaxtimizdagi Yoshlar ijod saroyida Yoshlar ishlari agentligi tomonidan tashkil etilgan “O‘zbekiston o‘quv markazlari forumi”ning birinchi kuni bo‘lib o‘tdi. Forum ta’lim sohasidagi tizimli islohotlar, o‘quv markazlari faoliyatini rivojlantirish va yoshlarning xorijiy tillar hamda zamonaviy kasblarni egallashi uchun yaratilayotgan imkoniyatlarga bag‘ishlandi.

Forumning ochilish marosimida O‘zbekiston mahallalar uyushmasi raisi Qahramon Quronboyev, AQShning O‘zbekistondagi Favqulodda va Muxtor elchisi Jonatan Xenik, Yoshlar ishlari agentligi direktori Alisher Sa’dullayev, Buyuk Britaniya Kengashining O‘zbekistondagi vakolatxonasi rahbari Michael Houlgate, “Yoshlar ittifoqi” Markaziy kengashi raisi Xayrulla Sattarov hamda “IDP IELTS” markazi rahbari Umidjon Ishmuhammedov ishtirok etdi.

So‘nggi yillarda yoshlar o‘rtasida xorijiy tillar va zamonaviy kasblarga bo‘lgan talab izchil ortib bormoqda. Tahlillarga ko‘ra, 2022-yilda 12 840 ta bo‘lgan ta’lim beruvchi subyektlar soni 2025-yilga kelib 38 465 taga yetib, so‘nggi uch yilda qariyb 3 baravar oshdi. Ushbu o‘quv markazlari tomonidan 72 mingga yaqin ish o‘rni yaratilib, tahsil olayotgan yoshlar soni 1 million nafardan oshdi.

Forumda respublika bo‘ylab keng qamrovda faoliyat yuritayotgan 700 dan ortiq o‘quv markazi vakillari, shuningdek, ta’lim sohasida katta tajribaga ega spikerlar ishtirok etdi. Ochiq muloqotlar va maxsus sessiyalar davomida o‘quv markazlarini rivojlantirish, ta’lim sifati va qamrovini oshirishga oid dolzarb masalalar muhokama qilindi.

Shuningdek, Davlatimiz rahbari tashabbusi bilan yo‘lga qo‘yilgan “Ko‘mak” loyihasi hamda “2+6” dasturi doirasida chekka hududlarda ham sifatli ta’lim imkoniyatlari kengayib borayotgani, bu esa o‘quv markazlari soni va qamrovining oshishiga muhim turtki bo‘layotgani alohida ta’kidlandi.

Forumning ikkinchi kuni — 13-dekabr kuni bo‘lib o‘tadi.