O‘zbekiston tarixida ilk bor ayol karatechi Jahon chempioni bo‘ldi!
2025-12-02 10:00:00 / Yangiliklar
2025-yil 27–30-noyabr kunlari Misrning Qohira shahrida Karate (WKF) bo‘yicha katta yoshli sportchilar o‘rtasida Jahon chempionati bo‘lib o‘tdi. Unda dunyoning 88 ta davlatidan 384 nafar sportchi ishtirok etdi.
O‘zbekiston milliy terma jamoasidan 8 nafar sportchi (4 erkak, 4 ayol) yo‘llanma asosida qatnashib, yurtimiz sharafini munosib himoya qildi.
Tarixiy natija — ilk bor ayol chempion!
19 yoshli Gulshan Alimardanova jahon chempionatida oltin medalni qo‘lga kiritib, O‘zbekiston tarixida ilk bor ayol karatechi sifatida Jahon chempioni bo‘ldi. Bu natija O‘zbekiston karate tarixi uchun yangi sahifa bo‘ldi.
20 yoshli Abdullaxhob Rashidov esa bronza medalini qo‘lga kiritib, jamoamiz natijasini yanada mustahkamladi.
Umumjamoa natijasi: O‘zbekiston jamoasi 1 ta oltin va 1 ta bronza bilan 6-o‘rinni egalladi.
(Misr — 1-o‘rin, Yaponiya, Italiya, Turkiya, Eron — 2-o‘rin, Qozog‘iston — 11-o‘rin)
Qayd etish joizki, MDH davlatlari orasida oltin medalni qo‘lga kiritgan yagona jamoa aynan O‘zbekiston bo‘ldi.
Bugun tongda Toshkent xalqaro aeroportida qahramonlarimiz tantanali tarzda kutib olindi. Yurtimiz sport jamoatchiligi, murabbiylar, muxlislar va yoshlar dargohlari vakillari chempionlarimizni g‘urur va faxr bilan qarshi oldi.