Tashrif davomida xodimlar muzeyda saqlanayotgan tarixiy hujjatlar, noyob fotosuratlar, arxiv materiallari va eksponatlar bilan yaqindan tanishdilar. Shuningdek, qatag‘on yillarida nohaq ta’qibga uchragan yurtdoshlarimiz, jadid ma’rifatparvarlari, davlat va jamoat arboblarining hayoti, faoliyati hamda xalqimiz taraqqiyoti yo‘lidagi xizmatlari haqida batafsil ma’lumotlarga ega bo‘ldilar.

Ayniqsa, Mahmudxo‘ja Behbudiy, Abdulla Avloniy, Munavvarqori Abdurashidxonov, Abdurauf Fitrat, Abdulla Qodiriy, Cho‘lpon singari millat fidoyilarining ilm-ma’rifat, ta’lim va milliy taraqqiyot yo‘lidagi sa’y-harakatlari, ularning murakkab va ibratli hayot yo‘li tashrif ishtirokchilarida katta taassurot qoldirdi.

Muzey bo‘ylab sayohat davomida qatag‘on davrining og‘ir oqibatlari, xalqimizning minglab fidoyi farzandlari boshidan kechirgan sinovlar hamda bugungi kunda ularning nomini tiklash va xotirasini abadiylashtirish borasida amalga oshirilayotgan ishlar haqida ham so‘z yuritildi.

Mazkur tashrif tarixiy xotirani asrab-avaylash, ajdodlarimizning jasorati va ma’rifatparvarlik merosini chuqur anglash, shuningdek, xodimlarda Vatanga sadoqat va daxldorlik tuyg‘ularini yanada mustahkamlashga xizmat qildi.