Vazirlar Mahkamasi huzuridagi elektr energiyasi, neft mahsulotlari va gazdan foydalanishni nazorat qilish inspeksiyasi

Joriy yilda o‘tkazilgan nazorat tadbirlarida tabiiy gaz va elektr energiyasidan noqonuniy foydalanish bo‘yicha 2 887 ta holat aniqlandi. 

Ushbu noqonuniy foydalanishlarning dastlabki hisob-kitob natijasiga ko‘ra, davlat manfaatlariga jami 1 trillion 243 milliard so‘m zarar yetkazilganligi ma’lum bo‘ldi. 

Unga ko‘ra, elektr energiyasi bo‘yicha 668,9 mlrd so‘m va tabiiy gaz bo‘yicha 574,7 mlrd so‘mlik energiya resurslari talon-toroj qilingan. 

Mazkur holatlarga huquqiy baho berilishi uchun 2 696 ta hujjatlar to‘plami huquqni muhofaza qiluvchi organlarga taqdim etildi. 

Shuningdek, iste’molchilar tomonidan energiya resurslaridan foydalanish qoidalarini buzish bilan bog‘liq huquqbuzarliklar bo‘yicha 5 296 ta ma’muriy ish rasmiylashtirildi. 

Neft mahsulotlari bo‘yicha olib borilgan sifat nazorati tadbirlarida AYOQSH va korxonalardan olingan tahlil na’munalaridan 377 ta holatda 9,3 mln litr neft mahsuloti sifatsizligi aniqlanib, sotuvga chiqarilishi oldi olindi. 

Yoqilg‘i-energiya resurslaridan samarali va oqilona foydalanish bo‘yicha 48 646 ta iste’molchilarga profilaktika tadbiri o‘tkazildi. 

O‘zenergoinspeksiya tomonidan iste’molchilarga davlat xizmatlarini ko‘rsatish bo‘yicha joriy yilda jami 10 981 ta obyektning elektr ta’minoti loyihalari ekspertizadan o‘tkazildi. Unga ko‘ra, 7 497 ta iste’molchining elektr qurilmalari elektr tarmoqlariga ulanishiga ruxsat berildi. 

Quvvati 50 kW va undan yuqori bo‘lgan iste’molchilarga berilgan ko‘rsatmalar davomida 5 361 ta iste’molchida reaktiv energiyasini kompensatsiya qilish bo‘yicha qurilmalarni o‘rnatilishi ta’minlandi. Buning natijasida 40,6 mln kilovatt-soat elektr energiyasi iqtisod qilinishiga erishildi. Berilgan ko‘rsatmalarni bajarmagan 368 ta iste’molchiga ma’muriy bayonoma rasmiylashtirildi. 

Inspeksiya barcha hududiy boshqarmalarida korrupsiyaga qarshi kurashish mavzusida 495 ta profilaktik targ‘ibot ishlari o‘tkazildi. Shuningdek, korrupsiyaga qarshi kurashish ishlarini tartibga soluvchi 11 ta ichki idoraviy hujjatlar qayta qo‘rib chiqildi. 

Inspeksiya tomonidan o‘tkaziladigan nazorat tadbirlarini ochiqligi va shaffofligini ta’minlash maqsadida o‘rganish va profilaktika tadbirlarida “Bodi kameralar”dan foydalanish tizimini yo‘lga qo‘yildi. 

O‘zenergoinspeksiya 2025-yil davomida amalga oshirilgan ishlarda yaqindan amaliy yordam ko‘rsatgan Bosh prokuratura, Davlat xavfsizlik xizmati, Ichki ishlar vazirligi va Iqtisodiy jinoyatlarga qarshi kurashish departamentiga o‘z minnatdorchiligini bildiradi.