O'zbekiston Respublikasi Vazirlar Mahkamasi huzuridagi Atom energiyasi agentligi "O'zatom"

📢 Bir qator OAV va ijtimoiy tarmoqlarda 2024-yil 5-dekabr kuni bo‘lib o‘tgan “Islom hamkorlik tashkilotiga a’zo davlatlarining barqaror rivojlanishida atom energiyasidan tinch maqsadlarda foydalanish istiqbollari: xalqaro va milliy tajriba” mavzusidagi xalqaro anjumanni o‘tkazish xarajatlari, jumladan, yashash, xonalar ijarasi va aviachiptalar xarajatlari davlat byudjeti hisobidan qoplanganligi haqidagi noto‘g‘ri ma’lumotlar tarqalishi munosabati bilan, “O‘zatom” agentligi vaziyatni aniqlashtirish va rasmiy munosabat bildirishi zarur deb hisoblaydi. Bunday fikrlar haqiqatga to‘g‘ri kelmaydi.

Tadbirni moliyalashtirish ishtirokchi-davlatlar kompaniyalari homiyligida, ular tomonidan taqdim etilgan mablag‘lar hisobidan to‘liq ta’minlanganini ma’lum qilamiz. Konferensiyani o‘tkazish bilan bog‘liq xarajatlarning birorta qismi byudjet mablag‘lari hisobidan qoplanmadi. Barcha moliyaviy operatsiyalar O‘zbekiston Respublikasining amaldagi qonunchiligi va xalqaro shaffoflik standartlariga qat’iy rioya qilgan holda amalga oshirildi.

🔗 Tadbirni o‘tkazish hamkorlar bilan sheriklik asosida amalga oshirildi va bunday tadbirlarni tashkil etish xalqaro amaliyotiga mos keladi. "O‘zatom" agentligi byudjet mablag‘laridan foydalanishni qat’iy nazorat qilib, faqat soha va mamlakat taraqqiyoti manfaatlarini ko‘zlab faoliyat yuritishini ta’kidlaydi.

✔️Agentlik moliyalashtirishning shaffofligi  to'g'risida axborot taqdim etish borasida ommaviy axborot vositalari uchun hamkorlikka doimo tayyor. Shu munosabat bilan, biz OAV vakillari va mustaqil jurnalistlarni axborot tarqatishda mas'uliyatli bo'lishga, faktlarni sinchkovlik bilan tekshirishga va voqealarni xolisona yoritish hamda noto'g'ri ma'lumotlar tarqalishining oldini olishga chaqiramiz.