O'zbekiston Respublikasi Vazirlar Mahkamasi huzuridagi Atom energiyasi agentligi "O'zatom"

2024-yil 5-dekabr kuni ko'hna Samarqand shahrida atom energiyasidan tinch maqsadlarda foydalanish va uni rivojlantirishning dolzarb masalalariga bag‘ishlangan Xalqaro konferensiya bo‘lib o‘tadi. 

  Tadbir atom energiyasidan tinch maqsadlarda foydalanishga oid asosiy masalalar va imkoniyatlarni muhokama qilish, milliy va xalqaro darajadagi ekspertlar o‘rtasida tajriba hamda bilim almashish uchun muhim maydon bo‘lib xizmat qiladi. 

Konferensiya haqida

  O‘zbekiston Respublikasi Prezidenti Administratsiyasi,  Vazirlar Mahkamasi va O‘zbekiston Respublikasi Vazirlar Mahkamasi huzuridagi Atom energiyasi agentligi hamkorligida tashkil etilayotgan konferensiya yuqori darajadagi ishtirokchilar, jumladan, davlat hokimiyati va boshqaruvi organlari, O‘zbekiston Respublikasi Hukumati va Oliy Majlisining vakillari, ilmiy hamjamiyat, xususiy kompaniyalar va davlat korxonalari hamda atom energetikasi sohasidagi barcha ekspertlarni bir joyda yig‘adi.

  Shuningdek, tadbirda Islom hamkorlik tashkiloti (IHT), Markaziy va Janubiy Osiyo, Rossiya, Yaqin Sharq, Yevropa Ittifoqi va AQSh mamlakatlarining yetakchi mutaxassislari hamda XAEA va Xalqaro atom energiyasi assotsiatsiyasi (WNA) ekspertlari ishtirok etadi.

Konferensiya maqsadi 

 Bugungi kunda zamonaviy texnologiyalarni rivojlantirish nuqtai nazaridan, kichik quvvatli atom elektr stansiyalari (KQAS) qurilishini qonunchilik va institutsional tartibga solish, ekspluatatsiya xavfsizligi va atom energiyasidan turli sohalarda foydalanish bilan bog‘liq bo‘lgan asosiy masalalarni muhokama qilish kun tartibida dolzarb mavzulardan biridir. 

  Konferensiya davomida ishtirokchilari o'zaro tajriba va bilim almashish imkoniyatiga ega bo‘lishadi, shuningdek, xalqaro hamkorlikni mustahkamlash, atom sanoatini qonuniy tartibga solish, ijtimoiy, ekologik va xavfsizlikning turli jihatlari, yadroviy texnologiyalarni tinch maqsadlarda rivojlantirish, kadrlar tayyorlashga oid turli masalalarini ko‘rib chiqadilar.

  Ushbu tadbir beshta panel sessiyani o‘z ichiga olgqn bo'lib, ularning har biri yadro energetikasining dolzarb jihatlariga qaratilgandir.  Birinchi sessiyada Islom hamkorlik tashkiloti mamlakatlarida (IHT) atom energiyasidan foydalanish istiqbollari oʻrganilib, Oʻzbekistonda atom energetikasini rivojlantirishga alohida eʼtibor qaratiladi. Ikkinchi sessiyada atom energiyasidan tinch maqsadlarda foydalanishni qo‘llab-quvvatlash, xalqaro standartlar va talablar asosida yadroviy obyektlar xavfsizligini ta’minlashda xalqaro tashkilotlar, xususan, XAEAning tutgan o‘rni va roli muhokama qilinadi.

  O‘tkaziladigan muhokamalarda yadro energiyasining ekologik va ijtimoiy jihatlari yetakchi oʻrinni egallashi, undan tashqari ishtirokchilar atom energiyasidan tinch maqsadlarda foydalanishda ESG standartlari va BMT Barqaror rivojlanish maqsadlari asosida IHT mamlakatlarida barqaror rivojlanishga erishishga qanday hissa qoʻshishi mumkinligi borasida fikr almashadilar. 

  Bundan tashqari, atom energetikasini barqaror rivojlantirish uchun zarur boʻlgan innovatsiyalar va texnologiyalarga, jumladan, atom energiyasidan tinch maqsadlarda xavfsiz va samarali foydalanishning muhim negizi boʻlgan taʼlim va kadrlar tayyorlash sohasidagi ustuvor yoʻnalishlarga eʼtibor qaratiladi.

Tadbirning asosiy vazifalariga quyidagilar kiradi:

· Oʻzbekistonda atom energetikasini rivojlantirishga alohida eʼtibor qaratgan holda IHT mamlakatlarida atom energiyasidan foydalanish istiqbollarini tahlil qilish.

· Atom energiyasidan tinch maqsadlarda foydalanishni qo‘llab-quvvatlash va xalqaro standartlarga muvofiq yadroviy inshootlar xavfsizligini ta’minlashda XAEA kabi xalqaro tashkilotlarning rolini muhokama qilish.

· IHT mamlakatlarida barqaror rivojlanishga erishish uchun atom energiyasidan foydalanishning ekologik va ijtimoiy jihatlarini o‘rganish.

· Yadro texnologiyalarini tinch maqsadlarda joriy etish, rivojlantirishni ilmiy- texnologik taraqqiyot va yangi texnologik tartibga o‘tishga ko‘maklashuvchi omil sifatida ko‘rib chiqish;

· Ta‘lim va kadrlar tayyorlash, shuningdek, atom energetikasini rivojlantirish uchun innovatsiyalarni joriy etish sohasidagi ustuvor yo‘nalishlarni belgilash.

  Konferensiya yadro energiyasidan tinch maqsadlarda xavfsiz va samarali foydalanishga qaratilgan strategiyalarni muhokama qilish va ishlab chiqish uchun muhim platforma bo‘lib, o‘z navbatida IHTga a’zo davlatlarning barqaror rivojlanishiga yordam beradi. 

  Ushbu tadbir ishtirokchilarga atom energiyasidan tinch maqsadlarda foydalanishning muhim jihatlari bo‘yicha bilimlarini chuqurlashtirish va tajriba almashish uchun noyob imkoniyat yaratadi. U xavfsizlikning yuqori standartlari, ekologik mas’uliyat va iqtisodiy maqsadga muvofiqligiga e’tibor qaratgan holda mamlakatda atom energetikasini muvaffaqiyatli rivojlantirishga xizmat qiladigan muhim hamkorlik maydoniga aylanadi.

  Shu nuqtai nazardan, XAEAning qo‘llab-quvvatlashi, jumladan, texnik yordam ko‘rsatish, normativ hujjatlarni ishlab chiqish va xavfsizlikni baholash alohida ahamiyatga egadir. Yetakchi mamlakatlar (Rossiya, AQSh, G‘arbiy Yevropa, Yaponiya, Janubiy Koreya, Xitoy) tajribasi yadro texnologiyalari ilmiy taraqqiyot, raqamlashtirish va iqtisodiy o‘sishga xizmat qilishini tasdiqlaydi. O‘zbekistonda atom texnologiyalari, xususan, yadro tibbiyoti, izotop ishlab chiqarish, ma’lumotlar markazlari va tadqiqot reaktorlarini rivojlantirish mamlakatning innovatsion iqtisodiyotga o‘tishda harakatlantiruvchi kuchga aylanishiga turtki bo‘lishi mumkin.

  Shu bilan birgalikda, konferensiya O‘zbekistonning xalqaro tajribani integratsiyalash va ilg‘or tajribalarni joriy etishga tayyorligini namoyish etadi, bu esa atom sanoati xavfsiz va samarali rivojlanishining asosiy negizidir.

OAV uchun aloqa vositalari:

Tashkilot: O‘zbekiston Respublikasi Vazirlar Mahkamasi huzuridagi Atom energiyasi agentligi

Tel.raqami: +998 71 202 09 17, (97) 428 25 15

Email: mediaconference@uzatom.uz

Konferensiyaning rasmiy veb-sayti: https://conference.uzatom.uz/

Ro‘yxatdan o‘tish uchun: https://conference.uzatom.uz/registration.html

Sana: 05.12.2024y.  9:30 dan 18:00 gacha

Vaqt: 09:00 dan ishtirokchilar yig‘ilishi

Biz ommaviy axborot vositalari vakillari va barcha tadbirda ishtirok etish istagida bo'lganlarni  tinchlik maqsadlarida atom energiyasining kelajagi haqidagi muhim  muloqotda qatnashishga taklif qilamiz