O‘zbekiston jamoasi “Zakovat formulasi” xalqaro chempionatining kuchli o‘ntaligiga kirdi
2024-10-30 16:50:00 / Atom texnologiyalari bo'yicha axborot markazi (ATAM)
"Zakovat formulasi" chempionati 8–11-sinf o‘quvchilari o‘rtasida “Nima? Qayerda? Qachon?" (NQQ) sport o'yini qoidalariga muvofiq tarzda o'tkaziladi. Loyihaning asosiy maqsadi intellektual o'yinlarni yosh avlod uchun ta'limning dolzarb formati sifatida ommalashtirishdir. Jamoalar turli fanlar bo'yicha savollarga javob berib, bilimdonlik, aql va mantiqiy fikrlash imkoniyatlarini namoyish etadilar.
Toshkentda maktab o‘quvchilari o‘rtasida “Zakovat formulasi” intellektual o‘yinlari chempionatining final bosqichi bo‘lib o‘tdi. O‘zbekistondagi maydonda maktab jamoalarini “O‘zatom” agentligi direktori Azim Isroilovich Axmedxadjaev va “AtomStroyExport” kommunikatsiyalar boshqarmasi boshlig‘i Nina Anatolyevna Dementsova kutib oldilar. Finalda O‘zbekiston, Rossiya, Belarus va Qozog‘istondan 125 ta jamoa onlayn tarzda g‘oliblik uchun kurash olib bordi va Toshkent shahri jamoasi umumiy reyting bo'yicha 6-o‘rinni egalladi.
O‘zbekistonlik maktab o‘quvchilari “Zakovat formulasi”da 2022-yildan buyon ishtirok etib kelmoqda. Bu yil respublikaning barcha hududlaridan 94 ta jamoa final bosqichida ishtirok etish uchun bellashdilar. Natijada, chempionat finalida mamlakat nomidan sakkizta maktab guruhi ishtirok etdi. O‘zbekistonning eng yaxshi jamoasi xalqaro turnir jadvalida oltinchi o‘rinni egallagan Toshkentning “Iqtidorlar akademiyasi” deb topildi. Jamoa finalning dastlabki ikki bosqichida umumjamoa hisobida peshqadam bo‘lishga muvaffaq bo‘lgan bo‘lsa, uchinchi bosqichda ishtirokchilar Rossiya jamoalariga o‘z pozitsiyalarini topshirdilar.
Xalqaro chempionat finali turli xil emotsiyalarga boy tarzda o'tdi. "Iqtidorlar akademiyasi" jamoasi a'zosi Solixa Adhamova bo'lib o'tgan o'yindagi taassurotlari haqida gapirdi: "– Bugun “Zakovat formulasi” xalqaro o‘yinining finalida O‘zbekiston sharafini himoya qildik. Bizning jamoamiz final bosqichida oltinchi, respublika bo'yicha esa birinchi o'rinni egalladi. Rostini aytsam, biz bundan biroz xafa bo'ldik. Natija ko'plab omillarga, shu jumladan omadga ham bog'liq ekan. Bugun, bizga to'sqinlik qilgan narsa, menimcha, o'yinda ortiqcha hissiyotga berilganimizdir deb o'ylayman. Shunday ekan, biz o'z ustimizda ishlashda davom etamiz. Biz albatta yana uchrashamiz!"