Joriy yilning 15-oktyabr kuni Toshkent shahrida energetika sohasida muhim xalqaro tadbir – “O‘zbekistonda atom energetikasini rivojlantirish muammolari va istiqbollari” mavzusida ilmiy-amaliy konferensiya bo‘lib o‘tdi. Tadbir atom energiyasidan tinch maqsadlarda foydalanishning dolzarb masalalari va imkoniyatlarini muhokama qilish, milliy va xalqaro ekspertlar o‘rtasida bilim va tajriba almashish uchun maydonga aylandi.

Ilg‘or xalqaro tadqiqotlar instituti Energetika diplomatiyasi va geosiyosat markazi hamda O‘zbekiston Vazirlar Mahkamasi huzuridagi Atom energiyasi agentligi hamkorligida tashkil etilgan anjumanda Vengriya, Turkiya, Janubiy Afrika Respublikasi, Serbiya, AQSH, Qozog‘iston va boshqa mamlakatlardan xalqaro ekspertlar ishtirok etdi.

Tadbirdan ko‘zlangan asosiy maqsad O‘zbekistonda atom energiyasidan foydalanishning afzalliklari va muammolarini atroflicha muhokama qilish edi. Ishtirokchilar atom energetikasi sohasidagi joriy va istiqbolli loyihalar, atom inshootlari xavfsizligini ta’minlash yo‘llari hamda yadro energetikasining mamlakat energetika balansidagi o‘rni bilan tanishdilar. Shuningdek, kadrlar tayyorlash, bu borada innovatsion texnologiyalarni joriy etish masalalariga alohida e’tibor qaratildi.

Konferensiya dasturidan davra suhbati shaklidagi ikkita panel sessiyasi o‘rin olgan bo‘lib, unda yetakchi mutaxassislar, ekspertlar hamda olimlar atom energetikasining istiqbollari va imkoniyatlariga bag‘ishlangan ma’ruzalar tingladilar. Muhokamalarda asosiy e’tibor atom energetikasi sohasida xavfsizlikni ta’minlashga qaratildi, unda ishtirokchilar yadroviy obyektlar faoliyati ishonchliligini oshirishga qaratilgan ilg‘or texnologiyalar va innovatsion usullarni ko‘zdan kechirdi. Atom elektr stansiyalari holatini monitoring qilish va nazorat qilish tizimini rivojlantirishning global tendensiyalari, shuningdek, yuzaga kelishi mumkin bo‘lgan xavf-xatarlarga tezkor javob berish mexanizmlari muhokama qilindi. Mutaxassislar hodisalar ehtimolini minimallashtirish va kasbiy tayyorgarlikni oshirish uchun xalqaro tajribani milliy amaliyotga, jumladan, muntazam mashg‘ulotlarga kiritish muhimligini ta’kidladilar. O‘zbekiston atom sanoatini yanada rivojlantirish uchun asos bo‘lishi kerak bo‘lgan xalqaro tartibga solish standartlarini joriy etish, milliy qonunchilikni jahon xavfsizligi va atom energiyasidan tinch maqsadlarda foydalanish standartlariga muvofiqlashtirishga alohida e’tibor qaratish muhim jihat bo‘ldi.

Muhokamalarda ijtimoiy-iqtisodiy va ekologik jihatlar ham muhim o‘rin tutdi. Ishtirokchilar atom energetikasini rivojlantirish mamlakatimiz energetik mustaqilligini mustahkamlash, yangi ish o‘rinlari yaratish va mahalliy mutaxassislarning malakasini oshirish orqali iqtisodiy o‘sishga ko‘maklashishda muhim ahamiyat kasb etishini ta’kidladilar. Anjumanda O‘zbekiston energetika sohasini diversifikatsiya qilishni qo‘llab-quvvatlash, ilmiy-texnikaviy sohada salohiyatni oshirish va tijorat hamkorlik, jumladan, investitsiyalarni jalb etish masalalari muhokama qilindi.

O‘zbekistonda yadro tibbiyoti va uning saratonga qarshi kurashdagi o‘rni, shuningdek, yadro texnologiyalarini noenergetik yo‘nalishlarida qo‘llash masalalariga alohida e’tibor qaratildi. Universitetlararo hamkorlik va atom sanoati uchun kadrlar tayyorlash vositasi sifatida filiallar yaratish mavzulari ham dolzarb bo‘ldi. Bundan tashqari, ishtirokchilar Vengriya va Rossiya o‘rtasida atom energetikasini rivojlantirish, Turkiya atom energetikasi dasturini rivojlantirish va yangi kelgan mamlakatlarda xavfsizlik madaniyatini o‘rnatish bo‘yicha hamkorlik tajribasi bilan o‘rtoqlashdilar, shuningdek, Janubiy Afrika Respublikasida atom energetikasini rivojlantirish masalalarini muhokama qildilar.

Mazkur tadbir xavfsizlikning yuqori standartlari, ekologik mas’uliyat va iqtisodiy maqsadga muvofiqligini hisobga olgan holda mamlakatimizda atom energetikasini yanada samarali rivojlantirishga xizmat qilishi lozim bo‘lgan bilim va tajriba almashish uchun muhim maydonga aylandi. Tadbir O‘zbekistonning xalqaro tajribani integratsiyalash va atom sanoatini xavfsiz hamda samarali rivojlantirishning zarur sharti bo‘lgan ilg‘or standartlarni joriy etishga tayyorligini namoyish etdi.