Reaktor maketidan chiqindilar va radonni saqlash maydonchasigacha: “MISIS”ning Olmaliqdagi filiali talabalari Atom texnologiyalari axborot markazida kunni qanday o‘tkazishdi
2026-10-05 10:30:00 / Atom texnologiyalari bo'yicha axborot markazi (ATAM)
“O‘zatom” agentligining Atom texnologiyalari axborot markazida “MISIS” Milliy tadqiqot texnologiya universitetining Olmaliq shahridagi filiali talabalari uchun ochiq dars bo‘lib o‘tdi.
Davlat rahbari atom energetikasini rivojlantirishning ustuvor yo‘nalishi sifatida kadrlar salohiyatini alohida ta’kidlaydi. Shu nuqtayi nazardan, Agentlik sohaga ixtisoslashgan oliy ta’lim muassasalari bilan tizimli ravishda ish olib bormoqda. Talabalarni soha obyektlarining tuzilishi, xavfsizlik talablari va tinch atom texnologiyalarini qo‘llash jarayonlari bilan yaqindan tanishish mumkin bo‘lgan mazkur maydonchaga doimiy ravishda taklif etib keladi va bugungi uchrashuv ham ana shu tizimli ishlarning uzviy bir qismidir.
Tadbir davomida talabalar maketlar zali ekspozitsiyasi bilan batafsil tanishdilar. Ularga reaktordan tortib, chiqindilar bilan ishlashgacha bo‘lgan atom sanoati obyektlari qanday tuzilgani hamda tinch atom texnologiyalarining energetika, tibbiyot, sanoat va ekologiya kabi muhim yo‘nalishlarda qo‘llanilishi batafsil ko‘rsatib berildi.
Shuningdek, Tibbiyot xodimlarining kasbiy malakasini rivojlantirish markazi Radiatsiya xavfsizligi kafedrasi assistenti Farruxxo‘ja Abdusattorov “Uran sanoati chiqindilarini saqlash va ko‘mish obyektlari hududlarida radiatsiyaviy vaziyatni baholash” mavzusida ma’ruza o‘qidi. Ma’ruzachi uran sanoati chiqindilarini saqlash va ko‘mish obyektlariga aynan nimalar kirishi, ularda qaysi radionuklidlar nazorat qilinishi hamda radiatsiyaviy ta’sirni qanday omillar yuzaga keltirishi haqida so‘zlab berdi. Shu bilan birga, havo, tuproq va suvning radiatsiyaviy monitoringi qanday tashkil etilishi, chiqindilarni izolyatsiya qilish choralari: himoya qoplamalari, suv oqizish tizimi va o‘simlik qoplamini qayta tiklash masalalari alohida ko‘rib chiqildi.
Radiatsiyaviy vaziyatni baholash faqatgina o‘lchovlar olib borish bilan cheklanib qolmaydi. Havo, tuproq va suvni o‘rganish xavf aynan qayerda yashiringanini ko‘rsatib bersa, rekultivatsiya buzilgan yoki ifloslangan yerlarni tozalash, ularni xavfsiz holatga keltirish va qayta xo‘jalik aylanmasiga kiritish bo‘yicha chora-tadbirlar majmuasi ushbu xavfni butunlay bartaraf etadi.
Bo‘lib o‘tgan uchrashuv atom sanoatida xavfsizlik, eng avvalo, chuqur bilimdan boshlanishini yana bir bor tasdiqladi.
“Maketlar zali nazariyani ko‘rgazmali tarzda ko‘rsatib bergan bo‘lsa, ma’ruza chiqindilarni saqlash va monitoring qilish amalda qanday tashkil etilishini tushuntirdi. Radiatsiya xavfsizligi – bu shunchaki qo‘shimcha mavzu emas, balki kasbimizning asosidir“, – dedi tadbir ishtirokchisi, “MISIS”ning Olmaliqdagi filiali talabasi Kamila Abbosova.
Agentlik yoshlarni atom sanoatining ilmiy va amaliy yo‘nalishlari bilan tanishtirish hamda soha uchun ishonchli kadrlar zaxirasini shakllantirish maqsadida bu kabi uchrashuvlarni kelgusida ham muntazam o‘tkazishni davom ettiradi.
Facebookdagi yangi sahifamizga obuna bo‘ling