O'zbekiston Respublikasi Vazirlar Mahkamasi huzuridagi Atom energiyasi agentligi

“O‘zatom“ agentligi hamda Rossiya fanga ko‘maklashish assotsiatsiyasi Umumrossiya jamoat tashkiloti (RFKA) o‘rtasida fan, texnologiyalar va innovatsiyalar sohasida o‘zaro anglashuv va hamkorlik memorandumi imzolandi.

Mazkur hujjatga „O‘zatom“ agentligi direktori Azim Axmedxadjayev hamda RASN Prezidiumi raisi, „Kurchatov instituti“ milliy tadqiqot markazi prezidenti Mixail Kovalchuk imzo chekdi.

Ushbu kelishuv O‘zbekiston Respublikasi Prezidenti Shavkat Mirziyoyev tomonidan belgilangan strategik maqsadlarning amaliy tasdig‘idir. Mazkur yondashuv atom sanoatiga shunchaki kafolatlangan elektr energiyasi manbai emas, balki mamlakat texnologik, sanoat va ilmiy taraqqiyotining yangi drayveri sifatida qaraydi. Davlat rahbari Jizzax viloyatida kam quvvatli atom elektr stansiyasi qurilishini boshlash marosimida ta’kidlaganidek, mamlakatimiz yuksak ilmiy salohiyat, ilg‘or muhandislik ko‘nikmalari hamda kelajakka strategik nigohni ifodalovchi yangi davrga qadam qo‘ymoqda. Qolaversa, Sankt-Peterburg xalqaro iqtisodiy forumida Prezidentimiz yadro energiyasidan tibbiyot, qishloq xo‘jaligi, sanoat va ilm-fan kabi tinchliksevar maqsadlarda foydalanish, shuningdek, Toshkentdagi "MMFI" filiali ko‘magida milliy yadro ilmiy maktabini tiklash va kadrlar tayyorlash tizimini kuchaytirish zarurligini alohida qayd etgan edi.

Aynan shu tamoyillar asosida tomonlar o‘zaro manfaatli ilmiy, ilmiy-texnikaviy va innovatsion hamkorlikni kengaytirishga kelishib oldilar. Imzolangan memorandumga ko‘ra, asosiy ustuvor yo‘nalishlari etib quyidagilar belgilandi: Atom energetikasi va yadro texnologiyalaridan tinchlik maqsadlarida foydalanish sohasidagi tadqiqotlarni jadallashtirish hamda istiqbolli ilmiy yechimlarni amaliyotga joriy etish; „megasayens“ toifasidagi qurilmalarni o‘z ichiga oluvchi ilg‘or tadqiqot infratuzilmasini yaratish va undan ilmiy maqsadlarda foydalanish; O‘zbekiston va Rossiyaning yetakchi tashkilotlari o‘rtasidagi ilmiy hamkorlik ko‘lamini kengaytirish; ilm-fan, texnologiya va innovatsiyalar sohasida axborot almashinuvini yo‘lga qoiyish, ekspertlar muloqotini kuchaytirish hamda ilmiy diplomatiyani rivojlantirish.

Shunday qilib, mazkur Memorandumning imzolanishi „O‘zatom“ agentligi va RFKA o‘rtasidagi istiqbolli ilmiy va yadro texnologiyalari sohasidagi hamkorlikning mustahkam poydevoriga aylandi. Ushbu qadam O‘zbekiston va Rossiya aloqalarining ilmiy-texnologik ko‘lamini yangi bosqichga olib chiqadi. Eng muhimi, mazkur kelishuv tinchlik atomi O‘zbekistonga shunchaki energiya manbai emas, balki mamlakat ilm-fani, innovatsiyalar poydevori hamda yuqori malakali muhandislarning yangi avlodini tarbiyalovchi qudratli drayverga aylanishi yo‘lidagi ulkan amaliy qadamdir.