XAEAning INIR “Follow-up” 2-bosqich missiyasi O‘zbekistondagi faoliyatini muvaffaqiyatli yakunladi
2026-06-24 12:00:00 / Majlislar
Bugun, Xalqaro atom energiyasi agentligi milliy yadro infratuzilmasini kompleks baholash bo‘yicha INIR “Follow-up” 2-bosqich missiyasining beshinchi, yakuniy kunida xalqaro ekspertlarning O‘zbekistondagi faoliyati o‘z nihoyasiga yetdi.
Ekspertlar besh kun davomida O‘zbekiston Respublikasida yadro infratuzilmasining rivojlanishini tahlil qildi. Yadroviy va radiatsiyaviy xavfsizlik, elektr tarmoqlarini rivojlantirish, kadrlar tayyorlash, manfaatdor tomonlarni jalb etish, atrof-muhitni muhofaza qilish hamda yadroviy jismoniy xavfsizlik masalalariga alohida e’tibor qaratildi.
XAEA ekspertlari davlatning tizimli ishlari, texnik tadqiqotlar, energetika tizimiga jalb qilingan investitsiyalar, mutaxassislarni tayyorlash dasturlari va jamoatchilik bilan samarali hamkorlikni yuqori baholadi.
Missiya yakunlari bo‘yicha ekspertlar dastlabki hisobotni tayyorlab, “O‘zatom” agentligiga topshirdi. Hujjat O‘zbekiston tomoni va XAEA rahbariyati bilan kelishish tartibidan o‘tadi. Hisobotning yakuniy nusxasi Xalqaro atom energiyasi agentligi platformasida rasman e’lon qilinib, jahon hamjamiyatiga taqdim etiladi.
Yakuniy kun doirasida ommaviy axborot vositalari vakillari uchun brifing ham bo‘lib o‘tdi va unda missiya rahbari Jon Haddad jurnalistlarning barcha savollariga batafsil javob berdi.
INIR “Follow-up” 2-bosqich missiyasining yakunlanishi O‘zbekiston Respublikasining yadroviy xavfsizlik va shaffoflik borasidagi eng yuqori xalqaro standartlarga sodiqligini tasdiqlovchi muhim bosqich bo‘ldi.