"O‘zatom" agentligi XAEAning INIR "Follow-up Phase 2" missiyasini qabul qilmoqda
2026-06-22 09:00:00 / Yangiliklar
22-iyun kuni “O‘zatom” agentligida Atom energiyasi bo‘yicha xalqaro agentlikning (XAEA) milliy yadroviy infratuzilmani kompleks baholash (INIR) bo‘yicha “Follow-up” Phase 2 formatidagi missiyasi o‘z ishini boshladi.
Missiya O‘zbekiston Respublikasi Prezidentining topshirig‘ini bajarish maqsadida eng yuqori xalqaro standartlar va XAEA talablariga qat’iy muvofiq ravishda amalga oshirilmoqda. U yadro energetikasi sohasidagi davlat siyosatini izchil amalga oshirishning muhim bosqichi bo‘lib, milliy yadro infratuzilmasining joriy holatini har tomonlama ekspertlik nuqtayi nazaridan ko‘rib chiqish, 2021-yilgi missiya tavsiyalarini bajarishdagi taraqqiyotni baholash, shuningdek, atom energiyasidan foydalanish sohasida davlat boshqaruvi va tartibga solish tizimini yanada takomillashtirish bo‘yicha aniq takliflarni ishlab chiqishga qaratilgan.
Missiya ishida XAEAga a’zo davlatlar – Iordaniya, Braziliya, Dominikan Respublikasi va Turkiyadan besh nafar xalqaro ekspert qatnashmoqda. Ularning barchasi Osiyo va Yevropa mamlakatlarida, jumladan Vetnam, Filippin, Polsha, Estoniya va Qozog‘istonda shunga o‘xshash missiyalarni o‘tkazish bo‘yicha katta tajribaga ega. Muhokamalarda xalqaro mutaxassislar bilan bir qatorda shuningdek, O‘zbekiston Respublikasi vazirlik va idoralari vakillari ham faol ishtirok etmoqdalar.
Missiyaning ochilish marosimida XAEA ekspertlari O‘zbekistonning Agentlik bilan ko‘p yillik hamkorligi yuksak darajada ekanini ta’kidladi. O‘zbekiston tomonidan yadro energetikasini rivojlantirish dasturini (NEPIO) amalga oshiruvchi milliy idora sifatida “O‘zatom” agentligi hamda mustaqil tartibga soluvchi organ sifatida Sanoat, radiatsiya va yadro xavfsizligi qo‘mitasi vakillari ishtirok etdi. Tomonlar 2021-yilgi missiyadan so‘ng milliy yadroviy infratuzilmani rivojlantirishda erishilgan imkoniyatlarni atroflicha muhokama qildi.
Kunning ikkinchi yarmida “Milliy pozitsiya”, “Yadro xavfsizligi” va “Boshqaruv” kabi asosiy yo‘nalishlar bo‘yicha amaliy muhokamalar bo‘lib o‘tdi. O‘zbekiston tomoni O‘zbekiston Respublikasining 2035-yilgacha mo‘ljallangan energetika siyosati, yadro xavfsizligi sohasidagi normativ-huquqiy va texnik-amaliy bazani yanada takomillashtirish rejalari, tartibga soluvchi organning faoliyati hamda mamlakatning yadro-energetika dasturiga jalb etilgan barcha asosiy tashkilotlarning boshqaruv tizimi to‘g‘risida batafsil ma’lumot taqdim etdi.
Missiya o‘z ishini 2026-yil 26-iyunga qadar davom ettiradi. Uning yakunlari bo‘yicha XAEA O‘zbekiston Respublikasining milliy yadroviy infratuzilmasini yanada rivojlantirish bo‘yicha aniq tavsiyalarni o‘z ichiga olgan dastlabki rasmiy hisobotni tayyorlaydi.