O'zbekiston Respublikasi Vazirlar Mahkamasi huzuridagi Atom energiyasi agentligi

18-mart kuni  O‘zbekiston Respublikasi Vazirlar Mahkamasi huzuridagi Atom energiyasi agentligi milliy qadriyatlar va umumxalq bayramlarining ma’naviy mazmunini yanada boyitish, xodimlar orasida tarixiy merosga qiziqish va hurmatni oshirish maqsadida agentlik markaziy apparati hamda “AES qurilishi direksiyasi” xodimlari o‘rtasida “Qadimiy tarix – qadriyat boqiyligi” mavzusida mazmunli sovrinli tanlov o‘tkazdi.

B‘lib o‘tgan tanlovning yakuniy bosqichida ishtirokchilar o‘zlarining chuqur bilimlari va ijodiy yondashuvlarini namoyish etish maqsadida qadimiy umumxalq bayramlari – Navro‘z, Ramazon va Qurbon hayitlari, Mehmonnavozlik, Sayil-sayohatlar, milliy marosimlar va an’analarning ko‘p asrlik tarixi, ularning falsafiy mohiyati, jamiyat hayotidagi o‘rni va bugungi kunda saqlanib qolgan qadr-qimmati haqida ilmiy asoslangan, ko‘plab tarixiy faktlar bilan boyitilgan insholar yozdilar.

Tanlov komissiyasi tomonidan har bir ish batafsil o‘rganib chiqildi. Ayniqsa, qadimiy manbalarga asoslangan aniq faktlar, milliy qadriyatlarning chuqur tahlili va zamonaviy talqin bilan boyitilgan insholar yuqori baholandi.

Yakuniy natijalar bo‘yicha tanlovning g‘olibi deb topilgan Abdiadizov Asadbek agentlik rahbariyati tomonidan qimmatbaho maxsus sovg‘a va sharafli sertifikat bilan taqdirlandi. G‘olibning ishi nafaqat boy ma’naviy mazmuni, balki o‘zbek xalqining ming yillik merosini asrash va uni kelajak avlodlarga yetkazishdagi mas’uliyat tuyg‘usini yorqin ifodalagani uchun alohida e’tirof etildi.

Ushbu tadbir agentlik jamoasida milliy an’ana va qadriyatlarga bo‘lgan hurmatni yanada mustahkamlash, xodimlar o‘rtasida ijodiy va ma’rifiy muhitni rivojlantirishga xizmat qildi hamda O‘zatomning ma’naviy-ma’rifiy yo‘nalishdagi faoliyatida muhim qadam bo‘ldi.

Agentlik kelgusida ham xodimlar orasida milliy tarix va madaniyatga oid shunday mazmunli, ruhiy boy tadbirlarni muntazam ravishda o‘tkazishni davom ettiradi.