O'zbekiston Respublikasi Vazirlar Mahkamasi huzuridagi Atom energiyasi agentligi

O‘zbekiston Respublikasi Sport vazirligi tomonidan Toshkent shahri Shayxontohur tumanidagi sport maktabida vazirliklar, idoralar va tashkilotlarda faoliyat yuritayotgan xotin-qizlar o‘rtasida respublika musobaqalari o‘tkazildi.

Tadbir "Sport -nafosat va salomatlik manbai" shiori ostida stol tennisi, shaxmat va shashka kabi sport turlari bo‘yicha tashkil etildi.

Musobaqani O‘zbekiston Respublikasi sport vaziri o‘rinbosari Shahrillo Mahmudov ochib berdi.

U o‘z tabrik so‘zida ishtirokchilarni qutladi va salomatlikni saqlash, mehnat unumdorligini oshirish va shaxsning barkamol rivojlanishi uchun jismoniy tarbiya bilan muntazam shug‘ullanish muhimligiga alohida to'xtaldi.

Musobaqalarda "O‘zatom" agentligi vakillari ham ishtirok etdilar. Agentlik xodimlari stol tennisi, shaxmat va shashka yo‘nalishlarida qatnashib, o‘zlarining yuksak tayyorgarligi, intizomi va g‘alabaga bo‘lgan intilishini namoyish etdilar.

Ushbu musobaqada respublikaning turli tashkilotlaridan umumiy 200 nafarga yaqin ishtirokchilar qatnashdi.
Musobaqalar yakunida har bir yo‘nalish bo‘yicha g‘olib va sovrindorlar medallar, diplomlar hamda qimmatbaho sovg‘alar bilan taqdirlandilar.

"O‘zatom" agentligi xodimlar o‘rtasida sog‘lom turmush tarzini shakllantirishga juda katta e’tibor qaratadi. Sport bilan muntazam shug‘ullanish atom energetikasining yuqori texnologiyali sohasida jismoniy va ruhiy salomatlikni saqlash, diqqatni jamlash hamda kasbiy faoliyat samaradorligini oshirishning muhim omili sifatida ko‘riladi.

Bunday respublika miqyosidagi tadbirlarda ishtirok etish korporativ madaniyatni mustahkamlash va faol turmush tarzini targ‘ib qilish borasidagi tizimli ishlarning namunasidir.

"O‘zatom" agentligi xodimlari jismoniy tarbiya va sportni rivojlantirish bo‘yicha tashabbuslarni qo‘llab-quvvatlashda hamda aholi salomatligini mustahkamlash va sog‘lom turmush tarzini ommalashtirishga qaratilgan respublika sport tadbirlarida faol ishtirok etishda davom etadi.