O'zbekiston Respublikasi Vazirlar Mahkamasi huzuridagi Atom energiyasi agentligi

22-noyabr kuni O‘zbekiston Respublikasi Vazirlar Mahkamasi huzuridagi Atom energiyasi agentligida Jamoatchilik kengashining birinchi yig‘ilishi bo‘lib o‘tdi.

Yig‘ilishda fuqarolik jamiyati institutlari vakillari, atom energetikasi, yadroviy va radiatsion xavfsizlik, yadro tibbiyoti, ekologiya sohalari bo‘yicha yetakchi mutaxassislar, shuningdek, Agentlik rahbariyati va xodimlari ishtirok etdilar.

Ishtirokchilar Jamoatchilik kengashining ish tartibini ko‘rib chiqib tasdiqladilar, faoliyatning asosiy yo‘nalishlarini, jamoatchilik bilan o‘zaro hamkorlik mexanizmlarini va 2026-yil hamda keyingi davrga mo‘ljallangan ustuvor vazifalarni belgilab oldilar.

Muhokama markazida atom energiyasidan tinchlik maqsadlarida foydalanish bo‘yicha milliy loyihalarni amalga oshirishda maksimal shaffoflik va ochiqlikni ta’minlash masalalari turdi. Bular jumlasiga atom elektr stansiyasini qurish, yadro tibbiyoti infratuzilmasini rivojlantirish, yuqori malakali kadrlar tayyorlash, Xalqaro atom energiyasi agentligi (MAGATE) talablari va tavsiyalariga to‘liq muvofiq holda yadroviy va radiatsion xavfsizlik tizimini kuchaytirish, milliy qonunchilikni xalqaro standartlarga moslashtirish kabilar kiradi.

Jamoatchilik kengashi fuqarolik jamiyati institutlarini yanada rivojlantirish va davlat organlari faoliyati ustidan jamoatchilik nazoratini takomillashtirish vazifalariga muvofiq tashkil etildi. Uning faoliyati davlat, ekspertlar hamjamiyati va fuqarolar o‘rtasida O‘zbekiston atom sanoatini rivojlantirishning barcha jihatlari bo‘yicha konstruktiv muloqot uchun samarali maydon yaratishga, loyihalarning jamoatchilik tomonidan qabul qilinishini ta’minlashga va aholi fikrini inobatga olishga qaratilgan.

Yig‘ilish yakunida muntazam ravishda yig‘ilishlar o‘tkazish, jamoatchilik eshituvlarini tashkil etish, loyihalarning amalga oshirilishini kuzatib borish, Agentlikning rasmiy kanallari va ommaviy axborot vositalari orqali fuqarolarni muntazam xabardor qilib turish bo‘yicha qarorlar qabul qilindi.

"O‘zatom" agentligi O‘zbekiston Respublikasining energetika xavfsizligini ta’minlash, barqaror iqtisodiy o‘sish va aholi turmush sifatini oshirishning strategik yo‘nalishi sifatida atom texnologiyalarini rivojlantirishda ochiqlik va jamoatchilik ishtirokini kuchaytirish bo‘yicha ishlarni davom ettiradi.