Shofirkonda irrigatsiya tarmoqlarini yaxshilashga qariyb 10 milliard so‘m yo‘naltirildi
2026-06-04 18:55:00 / Yangiliklar
Jumladan, Islom taraqqiyot banki guruhi ishtirokidagi “Qishloq joylarni barqaror rivojlantirish” dasturining birinchi bosqichi doirasida Mirzoqul, Xorkash, Do‘rmon, Bobur, Tezguzar va Pashmon mahallalarida umumiy uzunligi 15,6 kilometr bo‘lgan irrigatsiya tarmoqlarini ta’mirlash va betonlashtirish ishlari olib borilmoqda. Ushbu maqsadlar uchun qariyb 6 milliard so‘m mablag‘ yo‘naltirilgan.
Shuningdek, “Tashabbusli byudjet” loyihasi doirasida Jo‘yrabod mahallasi hududidan o‘tuvchi suv inshootini betonlashtirish ishlari amalga oshirilmoqda. Qiymati 1 milliard 648 million so‘m bo‘lgan mazkur loyiha suv yo‘qotilishini kamaytirish va aholi tomorqalarining suv ta’minotini yaxshilashga xizmat qiladi.
Tumanda “Og‘ir mahallalarni rivojlantirish” dasturi doirasida ham irrigatsiya infratuzilmasini takomillashtirish ishlari davom etmoqda. Xususan, Boboato, Ko‘rishkent va Iskogare mahallalarida qariyb 2 milliard so‘m mablag‘ hisobidan 3 kilometrdan ortiq ariq o‘zanlarini betonlashtirish rejalashtirilgan.
Bundan tashqari, “Qishloq joylarni barqaror rivojlantirish” dasturi doirasida Bog‘iafzal mahallasida uzunligi 1,7 kilometr bo‘lgan ichki sug‘orish tarmog‘i 600 million so‘m mablag‘ evaziga betonlashtirilmoqda.
Umuman olganda, Shofirkon tumanida irrigatsiya tarmoqlarini yaxshilashga qaratilgan mazkur loyihalar uchun qariyb 10 milliard so‘m mablag‘ safarbar etilgan. Bu ishlar suv resurslaridan samarali foydalanish, aholi tomorqalari va qishloq xo‘jaligi ekinlarini suv bilan ishonchli ta’minlash, shuningdek, qishloq hududlarining ijtimoiy-iqtisodiy rivojlanishiga xizmat qilishi kutilmoqda.