Jahon Banki vakillari Farg‘onadagi amalga oshirilayotgan loyihalari bilan tanishdi
2026-05-21 10:25:00 / Yangiliklar
Tashrifdan ko‘zlangan asosiy maqsad loyiha doirasida bajarilgan ishlar bilan tanishish, qurilish-montaj jarayonlarini o‘rganish, erishilgan natijalarni baholash hamda joylardagi ijro holatini tahlil qilishdan iborat bo‘ldi.
Jumladan, missiya a’zolari Farg‘ona tumanidagi “Oqbilol” mahallasi hududida barpo etilgan 205 va 210-sonli tik sug‘orish quduqlari faoliyati bilan yaqindan tanishdilar. Mutaxassislar tomonidan quduqlarning ishlash mexanizmi, suv ta’minotidagi ahamiyati va qishloq xo‘jaligi yerlarini suv bilan ta’minlashdagi samarasi haqida ma’lumot berildi.
Shuningdek, Jahon banki missiyasi vakillari “Avval–Log‘on” nasos stansiyasida amalga oshirilgan modernizatsiya ishlarini ham ko‘zdan kechirdilar. Tashrif davomida stansiyaning texnik imkoniyatlari, yangilangan uskunalar va suv yetkazib berish tizimidagi o‘zgarishlar haqida tushuntirishlar berildi.
Quvasoy shahridagi “Pakana” mahallasi hududida joylashgan “Chap qirg‘oq” kanalida amalga oshirilgan rekonstruksiya ishlari ham missiya a’zolari e’tiborida bo‘ldi. Qayd etilganidek, kanal rekonstruksiyasidan so‘ng hududda suv ta’minoti yaxshilanib, qishloq xo‘jaligi yerlarining samaradorligi oshgan.
Uchrashuv va muloqotlar davomida suv resurslaridan oqilona foydalanish, sohaga zamonaviy texnologiyalarni joriy etish, investitsiya loyihalarining ijtimoiy-iqtisodiy ahamiyati hamda kelgusidagi ustuvor vazifalar yuzasidan fikr almashildi