“Talimarjon” suv omborida texnik holat va raqamlashtirish ishlari o‘rganildi
2026-05-05 14:00:00 / Yangiliklar
O‘rganish jarayonida suv ombori to‘g‘oni hamda unga tegishli gidrotexnika inshootlarining texnik holati, ularning ishonchliligi, ekspluatatsiya qoidalariga rioya etilishi va amaldagi me’yoriy-huquqiy hujjatlar ijrosi ko‘rib chiqildi. Shuningdek, suv hisobini yuritish tartibi va nazorat mexanizmlari tahlil qilindi.
Shu bilan birga, Xitoyning “Ellipspace Technology Co. LTD” kompaniyasi tomonidan «Talimarjon» suv omborida o‘rnatilgan zamonaviy seysmik va suv o‘lchash qurilmalari faoliyati bilan yaqindan tanishildi. Ushbu zamonaviy qurilmalar orqali suv resurslarini aniq va real vaqt rejimida monitoring qilish imkoniyatlari ko‘zdan kechirilib, ularning samaradorligi baholandi.
Bundan tashqari, «Talimarjon» suv omborida o‘rnatilgan pezometrlarning texnik holati, ularning ishlash barqarorligi hamda yer osti suv bosimini nazorat qilishdagi ahamiyati yuzasidan ham atroflicha o‘rganish ishlari olib borildi.
Mazkur o‘rganish suv xo‘jaligida raqamli texnologiyalarni keng joriy etish, mavjud tizimlarni takomillashtirish hamda suv resurslarini samarali boshqarish yo‘nalishidagi ishlarni yanada jadallashtirishga xizmat qiladi.