Qo‘shrabot tumanida suv ta’minoti yaxshilanib, yerlar o‘zlashtirilmoqda
2026-04-29 15:45:00 / Yangiliklar
Xususan, Qo‘rg‘on, Toz va Urganji mahallalarida aholiga ijaraga berilgan, suv ta’minoti muammoli bo‘lgan 1200 gektar yer maydonini suv bilan ta’minlash maqsadida “Oqchopsoy” suv omboridan 7,4 kilometr uzunlikda quvur tarmog‘i tortildi.
Mazkur loyiha natijasida ilgari samarali foydalanilmagan yer maydonlarini o‘zlashtirish imkoniyati yaratildi. Bu esa dehqonchilikni kengaytirish, hosildorlikni oshirish va yerdan unumli foydalanishda muhim ahamiyat kasb etmoqda.
Amalga oshirilgan ishlar aholi bandligini ta’minlashda ham muhim omil bo‘lmoqda. Yangi ish o‘rinlari yaratilib, fuqarolarning daromad manbalari kengaymoqda. Shu bilan birga, qishloq xo‘jaligi mahsulotlari yetishtirish hajmini oshirish orqali ichki bozorni to‘ldirish va eksport salohiyatini mustahkamlashga zamin yaratilmoqda.
Mutaxassislarning ta’kidlashicha, ushbu yer maydonlarida pista va bodom kabi yuqori daromad keltiruvchi, eksportbop ekinlar bilan bir qatorda uzumchilikni rivojlantirish, xususan, mayizchilikni yo‘lga qo‘yish rejalashtirilgan.
Qisqacha aytganda, Qo‘shrabot tumanida amalga oshirilayotgan mazkur loyiha suv ta’minotini yaxshilash orqali yerdan samarali foydalanish, aholi farovonligini oshirish hamda hudud iqtisodiyotini barqaror rivojlantirishda muhim qadam bo‘lmoqda.