Yoshlar bandligi va kadrlar masalasi - ustuvor yo‘nalish
2026-04-16 17:40:00 / Yangiliklar
Zarafshon irrigatsiya tizimlari havza boshqarmasi tashabbusi bilan Pastdarg‘om tuman “Suv yetkazib berish xizmati” davlat muassasasida yoshlarni ish bilan ta’minlash hamda kadrlar masalalariga bag‘ishlangan yig‘ilish bo‘lib o‘tdi.
Yig‘ilishda asosiy e’tibor yoshlar bandligini ta’minlash, ularni sohaga keng jalb etish va malakali kadrlar zaxirasini shakllantirish masalalariga qaratildi. Qayd etilganidek, bugungi kunda tizimda yosh mutaxassislarni qo‘llab-quvvatlash, ularning bilim va ko‘nikmalarini oshirish, amaliyotga yaqinlashtirish muhim ahamiyat kasb etmoqda.
Shuningdek, kadrlar bilan ishlash sifatini yanada yaxshilash, rahbar va mutaxassislarning mas’uliyatini oshirish, xodimlarni tanlash va joy-joyiga qo‘yishda adolat va ochiqlikni ta’minlash zarurligi ta’kidlandi.
Yoshlarning taklif va tashabbuslarini qo‘llab-quvvatlash, ular uchun munosib mehnat sharoitlarini yaratish orqali sohada barqaror kadrlar tizimini shakllantirish mumkinligi aytildi.