“Yashil makon” – barhqaror ekologik muhit sari muhim qadam
2026-02-26 14:05:00 / Yangiliklar
Loyiha doirasida suv xo‘jaligi obyektlari atrofida ekologik muvozanatni mustahkamlash, iqlim sharoitini yumshatish, chang va shamol ta’sirini kamaytirish hamda yashil hududlar maydonini kengaytirish ustuvor vazifa sifatida belgilangan.
Jumladan, Qiziltepa tumanidagi “O‘rtacho‘l” va “Abumuslim” kanallari bo‘ylarining muhofaza zonasidan 5,4 gektar yer maydoni ajratilib, ushbu hududga 3 ming tup terak, 1,5 ming tup tol, 1 ming tup tut, 500 tup mevali daraxt ko‘chatlari ekildi.
Ushbu kko‘chatlarnitanlashda hududning tuproq-iqlim sharoiti, suv ta’minoti imkoniyatlari va uzoq muddatli yashil hudud barpo etish mezonlari inobatga olindi.
Ekilgan ko‘chatlarning barqaror o‘sishi va yaxshi tutib ketishini ta’minlash maqsadida muntazam sug‘orish ishlari tashkil etildi. Mutaxassislar tomonidan agrotexnik tadbirlar asosida parvarishlash, o‘g‘itlash va nazorat qilish ishlari yo‘lga qo‘yildi.
Mazkur ko‘kalamzorlashtirish ishlari nafaqat suv xo‘jaligi obyektlarining estetik ko‘rinishini yaxshilash, balki ekologik barqarorlikni ta’minlash, hududda yashil himoya zonalarini shakllantirish va aholiga yanada qulay tabiiy muhit yaratishga xizmat qiladi.
Shuningdek, mazkur tashabbus suv xo‘jaligi infratuzilmasi atrofida samarali yerdan foydalanish, atrof-muhitni muhofaza qilish va “yashil iqtisodiyot” tamoyillarini amaliyotga tatbiq etishning muhim bosqichi hisoblanadi.
“Yashil makon” loyihasi doirasida amalga oshirilayotgan bu kabi ishlar kelajak avlodlar uchun sog‘lom va barqaror ekologik muhitni shakllantirishga qaratilgan izchil sa’y-harakatlarning amaliy ifodasidir.