O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

Unda vazirlik, havza va irrigatsiya boshqarmalari mas’ul xodimlari, yuriskonsultlar hamda matbuot kotiblari ishtirok etdi.

Seminarda vazirlik Inson resurslarini rivojlantirish va boshqarish bo‘limi boshlig‘i Dilafro‘z Alliqulova har bir lavozim uchun belgilangan malaka talablari xodimning kasbiy bilim darajasi, ish tajribasi, funksional vazifalarni bajarish qobiliyati va shaxsiy kompetensiyalarini aniq belgilab berishini qayd etdi. Malaka talablariga rioya qilish kadrlar salohiyatini oshirish va boshqaruv sifatini ta’minlashda hal qiluvchi omil ekani ta’kidlandi.

Shuningdek, Suv xo‘jaligi obyektlarini ekspluatatsiya qilish agentligi bo‘lim boshlig‘i Jalol To‘xtayev davlat xizmatchilari odob-axloq qoidalari, xizmat intizomi va kasbiy mas’uliyat masalalariga to‘xtalib, qonun ustuvorligiga amal qilish, manfaatlar to‘qnashuviga yo‘l qo‘ymaslik, korrupsiyaning oldini olish hamda fuqarolar bilan ochiq va xushmuomala munosabatda bo‘lish zarurligini bildirdi.

Suv xo‘jaligi tashkilotlarida faoliyat yuritayotgan xodimlarning malaka talablariga muvofiqligi bo‘yicha Vazirlik ishchi guruhi rahbari Jonibek Xolmamatov Farg‘ona viloyatida xodimlarning malaka talablariga muvofiqligi bo‘yicha o‘tkazilgan o‘rganishlar yuzasidan qisqacha hisobot taqdim etdi.

Vazirlik bosh yuriskonsulti Faxriddin Soliyev qonunchilikdagi yangiliklar, yangilangan tartibda qabul qilingan "O‘zbekiston–2030 strategiyasi" mazmun-mohiyati hamda suv xo‘jaligi tizimi oldiga qo‘yilgan vazifalar haqida ma’lumot berdi.

Seminar yakunida ishtirokchilar o‘zlarini qiziqtirgan savollarga mutaxassislardan javob oldi.