Ma’naviy muhitni mustahkamlash yo‘lida
2026-02-15 10:20:00 / Yangiliklar
Mazkur tashabbus doirasida Quyi Sirdaryo irrigatsiya tizimlari havza boshqarmasi rahbariyati va xodimlari, Sirdaryo meliorativ ekspeditsiyasi hamda nasos stansiyalari va energetika boshqarmasi jamoasi Sirdaryo viloyati musiqali drama teatriga tashrif buyurdi. Tadbir xodimlar o‘rtasida jamoaviy birdamlikni kuchaytirish, ma’naviy qadriyatlarga ehtiromni oshirish va san’at orqali tarbiyaviy ta’sirni ta’minlashga qaratildi.
Teatr sahnasida “Afandining besh xotini” spektakli namoyish etildi. Asarda hajviy va ibratli voqealar orqali oilaviy munosabatlar, jamiyatdagi turli qarashlar hamda inson fe’l-atvoridagi ziddiyatlar mahorat bilan yoritildi. Sahna ko‘rinishlari va aktyorlar ijrosi tomoshabinlarda katta qiziqish uyg‘otdi.
Tomosha davomida hayotiy vaziyatlar orqali muhim xulosalar chiqarish, ma’naviy boyish va hayotga teranroq nazar tashlash imkoniyati yaratildi.
Bunday madaniy tadbirlar tashkilotlarda ijobiy muhitni mustahkamlash, xodimlarning ma’naviy saviyasini oshirish va san’atga bo‘lgan e’tiborni yanada kuchaytirishda muhim ahamiyat kasb etadi.