“Bobotog‘”da betonlash ishlari qanday olib borilmoqda
2025-12-18 15:25:00 / Yangiliklar
O‘zbekiston Respublikasi Prezidentining 2022-yil 27-sentyabrdagi “Orolbo‘yi havzasida suv resurslarini iqlim o‘zgarishiga mos holda boshqarish» loyihasini Osiyo taraqqiyot banki ishtirokida amalga oshirish chora-tadbirlari to‘g‘risida”gi qaroriga asosan 2022-yildan buyon Osiyo taraqqiyot banki ishtirokida “Orolbo‘yi havzasida suv resurslarini iqlim o‘zgarishiga mos holda boshqarish” loyihasi amalga oshirilmoqda.
Loyiha doirasida Surxondaryo viloyatining Jarqo‘rg‘on va Qumqo‘rg‘on tumanlarida mavjud 18,6 ming gektar ekin yer maydonlarini suv bilan ta’minlovchi “Bobotog‘” kanalida betonlash ishlari olib borilmoqda.
Ayni paytda obyektda jami 15 dan ortiq ekskavator, avtosamosval va boshqa turdagi mashina-mexanizmlar hamda 85 nafardan oshiq ishchilar jalb etilgan holda kunlik 280,0 m3 betonlash ishlari amalga oshirilmoqda.
Bugun Suv xo‘jaligi obyektlarini ekspluatatsiya qilish agentligi direktorining birinchi o‘rinbosari Ilhom Jo‘rayev va Amu-Surxon irrigatsiya tizimlari havza boshqarmasi boshlig‘i B.Alimov loyiha doirasida amalga oshirilayotgan ishlar bilan tanishib, mas’ullar ishtirokida yig‘ilish o‘tkazdi.
Yig‘ilish davomida pudratchi qurilish tashkilotiga obyektda ikki smenada ish tashkil qilgan holda kunlik beton olishni 500-600 m3 gacha yetkazish bo‘yicha tegishli ko‘rsatma va topshiriqlar berildi.
Shuningdek, qurilish ishlarini yanada jadallashtirish maqsadida qo‘shimcha 10 ta ekskavator va texniklarni jalb etish bilan birgalikda irrigatsiya tizimi boshqarmalarining ishchi-xodimlaridan iborat qo‘shimcha qurilish brigadalari jalb etildi.