O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

16-17-dekabr kunlari O‘zbekiston Respublikasi Prezidenti huzuridagi Boshqaruv samaradorligi agentligi hamda BMTning Oziq–ovqat va qishloq xo’jaligi tashkiloti (FAO) hamkorligida davlat organlari va tashkilotlarining kadrlar bilan ishlash bo‘linmalari rahbar xodimlari uchun o'quv-seminar o‘tkazildi.

Unda tashkilotlar rahbariyati, mas’ul vakillari, vazirlik va idoralarning HR bo‘linmalari rahbarlari ishtirok etdi.

O'quv-seminarda asosiy urg'u O‘zbekiston Respublikasi Prezidentining “Davlat xizmatida boshqaruv samaradorligini yanada oshirish chora-tadbirlari to‘g‘risida”gi yangi Farmonida belgilangan va HR mutaxassislari oldida turgan dolzarb masalalarga qaratildi.

Bugungi tez o‘zgaruvchan sharoitda davlat boshqaruvida inson resurslarini samarali boshqarish, kadrlar salohiyatini oshirish va zamonaviy HR yondashuvlarni joriy etish muhim vazifalardan biri hisoblanadi. Mamlakatda boshqaruv samaradorligini oshirishga qaratilgan keng qamrovli islohotlar sharoitida kadrlar bo‘linmalari rahbarlarining bilim va ko‘nikmalarini doimiy ravishda yangilab borish dolzarb ahamiyat kasb etmoqda.

Ikki kunlik o‘quv-seminar davlat boshqaruvi organlaridagi HR-reinjiniiring jarayonlari uchun strategik ahamiyatga ega maydon bo‘ldi. Prezidentimizning yangi Farmonlari ijrosi doirasida Suv xo‘jaligi vazirligi tizimiga raqamli transformatsiya va Sun’iy Intellekt (AI) yechimlarini integratsiya qilishda IT Park hamda Uzinfokom tashkilotlarining proaktiv tajribasi muhim metodologik asos bo‘lib xizmat qiladi.

Eng muhim drayverlardan biri — hrm.gov.uz va my.bsa.uz platformalari orqali kadrlar bilan ishlash jarayonlarini to‘liq avtomatlashtirishdir. Jarayonning elektron formatga o‘tishi nafaqat byurokratik to‘siqlarni kamaytiradi, balki shaffoflik va hisobdorlikni ham ta’minlaydi.

Shuningdek, "Yangi O‘zbekiston" universiteti tajribasida qo‘llanilayotgan AI-based recruiting (AI asosidagi rekruting) modellari, ayniqsa, nomzodlarni pre-skrining (pre-screening) va kompetensiyaviy baholash bosqichlarida inson resurslarini optimallashtirish imkonini beradi.

Inson kapitalini boshqarish tizimiga bunday innovatsion va Data-driven (ma’lumotlarga asoslangan) yondashuvlarni tatbiq etish, suv xo‘jaligi tizimidagi boshqaruv samaradorligini yangi sifat bosqichiga olib chiqishga yordam beradi.

Jalol To'xtayev,
Suv xo'jaligi obyektlarini ekspluatatsiya qilish agentligi
Inson resurslarini rivojlantirish va boshqarish bo'limi boshlig'i