O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

Assalomu alaykum!
Hurmatli qishloq xo‘jaligi va suv xo‘jaligi sohasi xodimlari, aziz suvchilar!

Sizlarni bugungi Qishloq xo‘jaligi xodimlari kuni munosabati bilan Suv xo‘jaligi obyektlarini ekspluatatsiya qilish agentligi jamoasi va shaxsan o‘zimning nomimdan samimiy muborakbod etaman.

Bugungi kunda qishloq xo‘jaligini suv resurslarisiz tasavvur etib bo‘lmaydi. Suv — hayot manbai, dehqonchilikning asosi, yurtimiz oziq-ovqat xavfsizligining tayanchidir. Ana shu bebaho ne’matni manbadan dalagacha yetkazib berish, gidrotexnik inshootlar, nasos stansiyalari, kanallar va kollektor-drenaj tarmoqlarining uzluksiz ishlashini ta’minlash yo‘lida siz, suv xo‘jaligi xodimlari fidokorona mehnat qilmoqdasiz.

Har qanday fasl va murakkab sharoitda ham suv xo‘jaligi obyektlarini ekspluatatsiya qilish, ularning texnik sozligi va xavfsizligini ta’minlash orqali sizlar qishloq xo‘jaligi barqarorligi va hosildorlikning oshishiga bevosita hissa qo‘shmoqdasiz. 

Suvni tejash, suvdan samarali foydalanish, zamonaviy sug‘orish texnologiyalarini joriy etish borasidagi sa’y-harakatlarimiz bugun har qachongidan ham muhim ahamiyat kasb etmoqda.

Yurtimizda suv xo‘jaligi tizimini tubdan takomillashtirish, infratuzilmani modernizatsiya qilish va suv resurslarini asrab-avaylashga qaratilgan islohotlar ijrosida sizlarning o‘rningiz alohida. Sizlarning halol mehnatingiz tufayli dalalarimiz obod, hosillarimiz barakali bo‘lmoqda.

Ushbu bayram munosabati bilan barchangizga mustahkam sog‘lik, xonadonlaringizga tinchlik va baraka, mas’uliyatli va sharafli mehnatingizda ulkan muvaffaqiyatlar tilayman. Suvimiz mo‘l, tizimlarimiz barqaror, mehnatingiz doimo qadrlansin!
Yana bir bor bayram muborak bo‘lsin!

Hurmat bilan,
Zokir Ishpulatov, 
Suv xo‘jaligi vazirining birinchi o‘rinbosari -
Suv xo‘jaligi obyektlarini ekspluatatsiya
qilish agentligi direktori.