Sariosiyo tumaniga yangi hokim tayinlandi
2025-11-01 14:30:00 / Yangiliklar
Xalq deputatlari Sariosiyo tumani Kengashining navbatdan tashqari sessiyasi bo‘lib o‘tdi. Unda Surxondaryo viloyati hokimi Ulug‘bek Qosimov ishtirok etdi.
Sessiyada tashkiliy masala ko‘rib chiqildi. Shu vaqtga qadar Sariosiyo tumani hokimi vazifasida ishlab kelgan Abduqodir Donayev boshqa ishga o‘tganligi sababli lavozimidan ozod etilgani ma’lum qilindi. Viloyat rahbari tuman hokimi vazifasiga Yaqubov Odiljon Almaxamadovich nomzodini taklif qildi va nomzod tuman Kengashi deputatlari tomonidan ma’qullandi.
Odiljon Yaqubov 1983-yilda Oltinsoy tumanida tug‘ilgan. 2005-yilda Toshkent davlat iqtisodiyot universitetini soliqlar va soliqqa tortish mutaxassisligi bo‘yicha tamomlagan.
Mehnat faoliyati davomida soliq organlarida turli vazifalarda, xususan, Denov va Termiz tumanlarida davlat soliq inspeksiyasi boshlig‘i, tuman hokimining birinchi o‘rinbosari lavozimlarida ishlagan.
Tayinlovga qadar Surxondaryo viloyati Kambag‘allikni qisqartirish va bandlik bosh boshqarmasi boshlig‘i lavozimida faoliyat yuritgan.