Sariosiyo tumani prokurori Botir Oltibayevning tuman aholisiga profilaktik ogohlantiruvchi murojaati
2026-10-05 07:10:00 / Murojaat
Hurmatli tuman aholisi!
Bugungi kunda jinoyatchilikka qarshi kurashish, fuqarolarning huquq va manfaatlarini himoya qilish, ularning mol-mulki daxlsizligini ta’minlash muhim vazifalardan biri hisoblanadi.
Ayniqsa, o‘g‘irlik va firibgarlik jinoyatlarining oldini olishda har bir fuqaroning hushyorligi va ehtiyotkorligi muhim ahamiyatga ega.
Shu munosabat bilan tuman prokuraturasi aholini quyidagilarga qat’iy rioya qilishga chaqiradi:
O‘G‘IRLIKDAN EHTIYOT BO‘LING!
Uy-joy, avtomashina, telefon, pul mablag‘lari va boshqa qimmatbaho buyumlarni qarovsiz qoldirmang.
Uydan chiqishda eshik, deraza va boshqa kirish joylarining ishonchli yopilganini tekshiring. Avtomashinada qimmatbaho buyumlar, telefon, sumka va pul mablag‘larini ko‘zga tashlanadigan joyda qoldirmang.
Telefon, velosiped, mototsikl va boshqa mol-mulklarni jamoat joylarida nazoratsiz qoldirmaslikka harakat qiling.
Ayniqsa, farzandlaringizga o‘z buyumlarini begona shaxslarga bermaslik, notanish shaxslar bilan muloqotda ehtiyotkor bo‘lish zarurligini tushuntiring.
FIRIBGARLARGA ALDANIB QOLMANG!
Bugungi kunda firibgarlikning turli usullari uchramoqda. Ayrim shaxslar telefon qo‘ng‘iroqlari, ijtimoiy tarmoqlar va internet saytlari orqali fuqarolarni aldab, ularning pul mablag‘larini qo‘lga kiritishga harakat qilmoqda.
Noma’lum shaxslarning telefon qo‘ng‘iroqlariga ishonib, bank kartangiz ma’lumotlarini bermang.
Bank xodimi, ichki ishlar organi, prokuratura yoki boshqa davlat organi xodimi sifatida tanishtirgan shaxs telefon orqali sizdan bank karta raqami, SMS-kod, PIN-kod yoki boshqa maxfiy ma’lumotlarni so‘rasa, ularni bermang.
Internetdagi shubhali havolalarni ochmang. Noma’lum shaxslarning talabi bilan telefonga dastur o‘rnatmang.
“Osson pul topish”, “katta daromad”, “sovrin yutdingiz”, “hisobingiz bloklandi”, “pul o‘tkazing, muammoni hal qilamiz” kabi xabarlarga ishonishdan oldin ma’lumotni rasmiy manbalar orqali tekshiring.
Shuningdek, internet orqali tovar yoki xizmat xarid qilayotganda ham sotuvchining ishonchliligiga e’tibor bering. Noma’lum shaxslarga oldindan pul o‘tkazishdan ehtiyot bo‘ling.
HUSHYORLIK — XAVFSIZLIK GAROVI
Jinoyat sodir etilgandan keyin uni fosh etishdan ko‘ra, uning oldini olish muhimroq.
Shuning uchun har bir fuqaro o‘z mol-mulkiga ehtiyotkorlik bilan munosabatda bo‘lishi, shubhali holatlarga befarq bo‘lmasligi va yaqinlarini ham ogohlantirishi lozim.
Agar sizga nisbatan o‘g‘irlik, firibgarlik yoki boshqa huquqbuzarlik sodir etilgan bo‘lsa yoki jinoyat sodir etilishiga oid ma’lumotga ega bo‘lsangiz, bu haqda huquqni muhofaza qiluvchi organlarga zudlik bilan xabar bering.
Hurmatli fuqarolar!
Jinoyatchilikka qarshi kurashish — nafaqat huquqni muhofaza qiluvchi organlarning, balki butun jamiyatning umumiy vazifasidir.
Barchangizni hushyorlikka, qonunga rioya qilishga, o‘zingiz va yaqinlaringizni jinoiy tajovuzlardan asrashga chaqiramiz.
Mol-mulkingizga ehtiyotkor bo‘ling!
Shubhali qo‘ng‘iroq va xabarlarga ishonmang!
Bank karta ma’lumotlaringizni hech kimga bermang!
Jinoyatga befarq bo‘lmang!