Sariosiyo tumanida Investitsiya dasturi doirasida yangi ijtimoiy obyekt foydalanishga topshirildi
2026-09-29 15:25:00 / Tadbirlar
Sebzor mahallasida joylashgan 38-sonli umumta’lim maktabining qo‘shimcha 660 o‘rinli zamonaviy o‘quv binosi foydalanishga topshirildi.
Mazkur bunyodkorlik ishlari o‘quvchilar uchun zamonaviy va qulay ta’lim sharoitlarini yaratish, ta’lim sifati va samaradorligini yanada oshirish maqsadida amalga oshirildi.
Yangi o‘quv binosining ochilish marosimida Sariosiyo tumani hokimi Odiljon Yaqubov, ta’lim sohasi mutasaddilari, nuroniylar, maktab jamoasi, ota-onalar hamda keng jamoatchilik vakillari ishtirok etdi.
Tadbirda tuman hokimi Odiljon Yaqubov so‘zga chiqib, yig‘ilganlarni O‘zbekiston Respublikasi davlat mustaqilligining 35 yilligi hamda Sariosiyo tumani tashkil etilganining 100 yilligi bilan samimiy muborakbod etdi.
Shuningdek, mamlakatimizda ta’lim sohasida amalga oshirilayotgan keng ko‘lamli islohotlar, yosh avlod uchun yaratilayotgan zamonaviy imkoniyatlar haqida so‘z yuritilib, mazkur yangi bino o‘quvchilarning sifatli ta’lim olishi va kelgusida munosib natijalarga erishishida muhim ahamiyat kasb etishi ta’kidlandi.
Shundan so‘ng ishtirokchilar yangi o‘quv binosida yaratilgan zamonaviy shart-sharoitlar bilan yaqindan tanishdilar.
Ma’lumot uchun, “Binokor Foziljon Baraka” xususiy korxonasi tomonidan 8 milliard 49 million so‘m mablag‘ evaziga Sebzor mahallasidagi 38-sonli umumta’lim maktabiga qo‘shimcha 660 o‘rinli o‘quv binosi barpo etildi.