Surxondaryo viloyati Sariosiyo tumani hokimligi

Sariosiyo tumani prokurori Botir Oltibayevning tuman aholisiga
murojaati

Hurmatli tuman aholisi!

Oila – jamiyatning tayanchi, farzandlar tarbiyasi va inson kamoloti shakllanadigan muqaddas maskandir.

Afsuski, ayrim holatlarda oilaviy kelishmovchiliklar janjal, tazyiq va zo‘ravonlikka aylanib, og‘ir oqibatlarga sabab bo‘lmoqda.

Shu munosabat bilan barcha fuqarolarni oilaviy-maishiy nizolarning oldini olishga, bir-biriga hurmat va bag‘rikenglik bilan munosabatda bo‘lishga chaqiramiz.

Unutmang:

Haqorat qilish, tahdid qilish, doimiy ruhiy bosim o‘tkazish ham zo‘ravonlik hisoblanadi.

Turmush o‘rtog‘i, farzandlar yoki oila a’zolariga nisbatan kuch ishlatish qonun oldida javobgarlikka sabab bo‘ladi.

Oilaviy janjallarni kuch bilan emas, muloqot va o‘zaro kelishuv orqali hal etish lozim.

Nizo kelib chiqqan taqdirda, mahalla faollari, profilaktika inspektori, xotin-qizlar faoli yoki mutasaddi tashkilotlarga murojaat qilishdan tortinmang.

Aziz yurtdoshlar!

Har bir oilada tinchlik va o‘zaro hurmat bo‘lsa, mahallada osoyishtalik, jamiyatda barqarorlik ta’minlanadi.

Farzandlarimiz bizning muomalamiz va xatti-harakatlarimizdan ibrat oladi.

Shuning uchun har birimiz oilada sog‘lom muhitni saqlashga mas’ulmiz.
Barchangizni oilaviy-maishiy huquqbuzarlik va jinoyatlarning oldini olishda faol bo‘lishga, murosa, sabr-toqat va o‘zaro hurmatni ustuvor qadriyat sifatida qadrlashga chaqiramiz.

Tinch va ahil oila – farovon jamiyat garovidir.