Sariosiyoda suvdan samarali foydalanish va hosildorlikni oshirish maqsadida mexanizator va suvchilar bilan uchrashuv o‘tkazildi
2026-07-18 10:00:00 / Qishloq va suv xo'jaligi
Sariosiyo tumani hokimi Odiljon Yaqubov, tuman IIB boshlig‘i G‘.Xo‘jamqulov hamda tuman prokurori o‘rinbosari F.Mamadaliyev boshchiligida qishloq xo‘jaligi sohasi mas’ullari, fermer xo‘jaliklari rahbarlari, mexanizatorlar va suvchilar ishtirokida uchrashuv o‘tkazildi.
Uchrashuvda bugungi ob-havo sharoitida suv resurslaridan oqilona va samarali foydalanish, sug‘orish ishlarini to‘g‘ri tashkil etish hamda suvchilarning mas’uliyatini yanada oshirish masalalariga alohida e’tibor qaratildi.
Ta’kidlanganidek, g‘o‘za maydonlarida sug‘orish ishlarini belgilangan me’yor va muddatlarda amalga oshirish, sharbat usulida sug‘orishni keng qo‘llash, kultivatsiya va chekanka ishlarini o‘z vaqtida bajarish, shuningdek, mineral va mahalliy o‘g‘itlar bilan oziqlantirish hosildorlikni ta’minlashning muhim omili hisoblanadi.
Yig‘ilish davomida hudud rahbarlari va mutasaddilarga sug‘orish, kultivatsiya hamda chekanka ishlarini bosqichma-bosqich, sifatli va belgilangan muddatlarda tashkil etish yuzasidan aniq topshiriqlar berildi. Suvchilarning fidokorona mehnatini munosib rag‘batlantirish, ularni zarur sharoit va vositalar bilan ta’minlash masalalari ham muhokama qilindi.
Uchrashuv yakunida suvchilarga zarur mehnat qurollari — belkurak, ketmon, fonar, etik va bosh kiyimlar topshirildi hamda ularning mehnat haqlari berildi.
Tadbir so‘ngida mo‘l va barakali hosil tilab, dasturxon atrofida bir piyola choy ustida yurtimiz tinchligi, xalqimiz farovonligi va dehqonlarning rizqi barakali bo‘lishi uchun duoga qo‘l ochildi.