Yoqutli bog‘ mahallasida 240 o‘rinli yangi bog‘cha foydalanishga topshirildi
2026-07-15 12:00:00 / Tadbirlar
Sariosiyo tumani Yoqutli bog‘ mahallasida 240 o‘ringa mo‘ljallangan 41-sonli davlat maktabgacha ta’lim tashkiloti foydalanishga topshirildi.
Ochilish marosimida Sariosiyo tumani hokimi Odiljon Yaqubov, tuman Maktabgacha va maktab ta’limi bo‘limi mas’ullari, ota-onalar, nuroniylar, deputatlar hamda keng jamoatchilik vakillari ishtirok etdi. Tadbir davomida ishtirokchilar yangi muassasada yaratilgan zamonaviy shart-sharoitlar bilan yaqindan tanishib, bolajonlar uchun yaratilgan qulay muhitni ko‘zdan kechirdilar.
Ma’lumot uchun, mazkur maktabgacha ta’lim tashkiloti “Binokor Foziljon Baraka” xususiy korxonasi tomonidan 7 milliard 800 million so‘m mablag‘ evaziga barpo etildi. Muassasa 240 nafar tarbiyalanuvchini qabul qilish quvvatiga ega bo‘lib, unda zamonaviy oshxona, musiqa zali, bolalar o‘yin maydonchalari, mashg‘ulotlar uchun tashqi ayvonlar hamda ta’lim-tarbiya jarayonini sifatli tashkil etish uchun barcha zarur shart-sharoitlar yaratilgan.
Yangi bog‘chaning foydalanishga topshirilishi mahalladagi maktabgacha ta’lim qamrovini kengaytirish, bolalarning zamonaviy va qulay sharoitlarda ta’lim-tarbiya olishini ta’minlash hamda ota-onalar uchun qo‘shimcha qulayliklar yaratishda muhim ahamiyat kasb etadi.