Sariosiyo tumani hokimi Odiljon Yaqubovning tuman aholisi va yoshlariga MUROJAATI
2026-06-15 07:25:00 / Murojaat
Hurmatli tumandoshlar, aziz yoshlar!
Bugungi kunda giyohvandlik va psixotrop moddalar iste'moli nafaqat bir insonning, balki oila, mahalla va jamiyatning kelajagiga jiddiy xavf solayotgan illatlardan biridir. Bu balo inson salomatligini yemiradi, uning orzu-maqsadlarini so‘ndiradi, oilalar tinchligi va farovonligiga putur yetkazadi.
Yurtimizda yoshlar uchun keng imkoniyatlar yaratilayotgan, ta'lim, sport, tadbirkorlik va kasb-hunar egallash uchun barcha sharoitlar mavjud bo‘lgan bir paytda, ayrim kimsalarning noqonuniy giyohvand moddalarni tarqatishga urinayotgani barchamizni hushyor bo‘lishga undaydi.
Aziz yoshlar!
Sizlar Vatanimizning buguni va ertasisiz. Hayotingizni zaharlovchi, kelajagingizni barbod qiluvchi har qanday zararli odatlardan yiroq bo‘ling. Bo‘sh vaqtingizni ilm olishga, sport bilan shug‘ullanishga, kasb o‘rganishga va ezgu maqsadlar sari intilishga bag‘ishlang. Unutmang, sog‘lom turmush tarzi — muvaffaqiyat va baxtli hayotning eng muhim garovidir.
Hurmatli ota-onalar, ustozlar va mahalla faollari!
Farzandlarimiz tarbiyasi va kelajagi uchun barchamiz mas'ulmiz. Ularning qiziqishlari, do‘stlari va kundalik mashg‘ulotlariga befarq bo‘lmaylik. Oila, ta'lim muassasalari va mahalla hamkorligi orqali yoshlarni turli zararli ta'sirlardan asrashimiz mumkin.
Barchangizni giyohvandlikka qarshi kurashishda faol fuqarolik pozitsiyasini namoyon etishga, yoshlarimizni sog‘lom va barkamol etib tarbiyalash yo‘lida birlashishga chaqiraman.
Birgalikda sog‘lom, xavfsiz va farovon jamiyat barpo etamiz!