Bog‘dorchilik va chorvachilik yo‘nalishidagi ustuvor vazifalar muhokama qilindi
2026-05-15 15:00:00 / Qishloq va suv xo'jaligi
Sariosiyo tumani hokimi O.Yaqubov rahbarligida kengaytirilgan yig‘ilish bo‘lib o‘tdi. Unda tuman prokurori B.Oltibayev, tuman IIB boshlig‘i G‘.Xo‘jamqulov, qishloq xo‘jaligi sohasi mas’ullari, shuningdek, tumandagi bog‘dorchilik va chorvachilik yo‘nalishida faoliyat yuritayotgan fermer xo‘jaliklari rahbarlari ishtirok etdi.
Yig‘ilish davomida qishloq xo‘jaligi sohasida amalga oshirilayotgan ishlar, mavjud muammo va kamchiliklar hamda sohani yanada rivojlantirish bo‘yicha ustuvor vazifalar muhokama qilindi. Xususan, bog‘dorchilik va chorvachilik tarmoqlarida mahsuldorlikni oshirish, yer va suv resurslaridan samarali foydalanish, agrotexnik tadbirlarni o‘z vaqtida va sifatli amalga oshirish masalalariga alohida e’tibor qaratildi.
Shuningdek, fermer xo‘jaliklari faoliyatida qonunchilikka rioya qilish, oziq-ovqat xavfsizligini ta’minlash, aholi bandligini oshirish hamda eksportbop mahsulotlar yetishtirish yuzasidan mas’ullarga tegishli topshiriqlar berildi.
Bundan tashqari, O‘zbekiston Respublikasi Prezidentining 2026-yil 8-maydagi PF-82 va PF-83-son Farmonlari mazmun-mohiyati hamda ushbu farmonlar asosida yaratilayotgan keng imkoniyat va imtiyozlar yuzasidan bog’dorchilik va chorvachilik fermer xo’jaliklari rahbarlariga tegishli tushuntirishlar berildi.
Yig‘ilish yakunida sohaga oid ishlarni tizimli tashkil etish, mavjud imkoniyatlardan unumli foydalanish hamda belgilangan vazifalar ijrosini ta’minlash bo‘yicha aniq chora-tadbirlar belgilab olindi.