Prezident topshiriqlari ijrosi: Sariosiyo tumanida payshanba - “Yoshlar kuni” tadbirlari o‘tkazildi
2026-03-12 15:00:00 / Yangiliklar
Prezidentimiz tashabbusi bilan joriy etilgan payshanba - “Yoshlar kuni” munosabati bilan bugun Sariosiyo tumanida qator tadbirlar tashkil etildi. Shu munosabat bilan tuman hokimi Odiljon Yaqubov Sariosiyo tumanidagi 2-sonli politexnikumda o‘tkazilgan “Hokim va yoshlar uchrashuvi”da ishtirok etdi.
Uchrashuv avvalida ta’lim muassasasida tashkil etilgan fan to‘garaklari, o‘quv ustaxonalari hamda yoshlarning kasbiy ko‘nikmalarini oshirish bo‘yicha amalga oshirilayotgan ishlar bilan yaqindan tanishildi. Shuningdek, o‘quvchi-yoshlarning zamonaviy bilim va kasb-hunarlarni puxta egallashi uchun yaratilgan shart-sharoitlar ko‘zdan kechirilib, bu boradagi ishlarni yanada takomillashtirish yuzasidan mas’ullarga tegishli vazifalar belgilab berildi.
Shundan so‘ng tuman hokimi Odiljon Yaqubov hamda tuman prokurori B.Oltiboyev yoshlar bilan ochiq muloqot o‘tkazib, ularning taklif va tashabbuslari hamda murojaatlarini tingladi. Muloqot davomida yoshlar bilan ochiq va samimiy suhbat qilib, ularning fikr-mulohazalari, taklif va muammolarini tingladi.
Uchrashuvda yoshlar tomonidan ko‘tarilgan bandlik, tadbirkorlikni qo‘llab-quvvatlash, tashabbuslarini amalga oshirishda ko‘maklashish kabi masalalarning har biriga mas’ullar biriktirilib, tezkor ravishda o‘rganish va hal etish vazifasi topshirildi.
Tadbir yakunida politexnikum talabalari orasida turli yo‘nalishlarda yuqori natijalarga erishgan faol yoshlar faxriy yorliqlar hamda esdalik sovg‘alari bilan tantanali ravishda taqdirlandi.