“Yoshlar kuni” munosabati bilan yoshlar uchun bo‘sh ish o‘rinlari mehnat yarmarkasi tashkil etildi
2026-03-12 11:00:00 / Yangiliklar
O‘zbekiston Respublikasi Prezidenti tomonidan joriy yil 24-fevral kuni yoshlar bilan o‘tkazilgan uchrashuvda belgilab berilgan ustuvor vazifalar ijrosini ta’minlash maqsadida mamlakatimizda har haftaning payshanba kuni “Yoshlar kuni” etib belgilangan.
Mazkur tashabbus doirasida bugun Sariosiyo tumani “Yangi O‘zbekiston” istirohat bog‘idagi Ma’naviyat maskanida yoshlar bandligini ta’minlashga qaratilgan bo‘sh ish o‘rinlari mehnat yarmarkasi tashkil etildi. Tadbir tuman hokimligi, tuman prokuraturasi, Yoshlar ishlari bo‘limi hamda Kambag‘allikni qisqartirish va bandlikka ko‘maklashish bo‘limi hamkorligida o‘tkazildi.
Tadbir davomida mutasaddi tashkilotlar vakillari tomonidan mehnat yarmarkasining ahamiyati, yoshlar bandligini ta’minlash borasida yaratilayotgan yangi imkoniyatlar va shart-sharoitlar haqida batafsil ma’lumotlar berildi. Shuningdek, mehnat huquqi, bandlik hamda mehnat munosabatlari bo‘yicha mutaxassislar tomonidan yoshlar va fuqarolarga zarur huquqiy maslahatlar ham taqdim etildi.
Mehnat yarmarkasida 24 ta davlat va nodavlat tashkilotlari ishtirok etib, jami 134 ta bo‘sh ish o‘rni taklif qilindi. Tadbir yakunida 12 nafar ishsiz yosh mehnat yarmarkasining o‘zidayoq munosib ish o‘rinlariga joylashish imkoniyatiga ega bo‘ldi. Bundan tashqari, 56 nafar fuqaroga mehnat va bandlik masalalari yuzasidan huquqiy maslahatlar berildi.
Mazkur tadbir yoshlarning bandligini ta’minlash, ularning tadbirkorlik tashabbuslarini qo‘llab-quvvatlash hamda jamiyat hayotidagi faolligini oshirishga xizmat qiluvchi muhim tashabbuslardan biri bo‘ldi.