Surxondaryo viloyati Sariosiyo tumani hokimligi

Sariosiyo tumanida aholi, ta’lim muassasalari hamda hududlarni favqulodda vaziyatlardan ishonchli muhofaza qilish, bahor mavsumida yuzaga kelishi ehtimoli bo‘lgan xavf-xatarlarning oldini olishga qaratilgan yig‘in o‘tkazildi.

Tadbir tuman hokimi – fuqaro muhofazasi boshlig‘i Odiljon Yaqubov rahbarligida tashkil etildi. Unda davlat va jamoat tashkilotlari, huquqni muhofaza qiluvchi organlar, FVDQT kuch va vositalari, ta’lim tizimi mas’ullari, “mahalla yettiligi” vakillari ishtirok etdi.

Amaliy tayyorgarlik doirasida maxsus texnika va qutqaruv vositalari namoyish etildi. Yig‘inda bahor oylarida sel va suv toshqinlari xavfini kamaytirish, hududlarda profilaktik tadbirlarni kuchaytirish, ta’lim muassasalarida yong‘in xavfsizligini ta’minlash bo‘yicha aniq vazifalar belgilab berildi.

Mutasaddilarga favqulodda vaziyatlarning oldini olish, yuzaga kelishi mumkin bo‘lgan holatlarda tezkor va muvofiqlashgan harakat qilish yuzasidan qat’iy topshiriqlar berildi.

Shuningdek, ta’lim tizimida mavjud muammolarni bartaraf etish, shaffoflikni ta’minlash va korrupsiyaviy holatlarga qarshi murosasiz kurashish masalalari ham atroflicha muhokama qilindi.