“Yangi O‘zbekiston” massivida yangi turar joylar foydalanishga topshirildi
2026-01-13 17:30:00 / Yangiliklar
Aholini sifatli turar joy bilan ta’minlash dasturi doirasida 2025-yilda Sariosiyo tumanida 18 ta 566 xonadonli turar joylar barpo etilishi belgilangan bo‘lib, qurilishi yakunlangan uy-joylar bosqichma-bosqich o‘z egalariga topshirilmoqda.
Xususan, bugun Lutfkor mahallasi Yangi O‘zbeksiton massivida “Makro Global Story Invest” MChJ tomonidan barpo etilgan 1 ta yetti qavatli turar joydagi 42 ta xonadon foydalanishga topshirildi. Yangi O‘zbeksiton massivida qad rostlagan ushbu uy-joylar barcha zamonaviy talablarga javob beradigan sharoitlar, zarur muhandislik kommunikatsiyalari va qulay infratuzilma bilan ta’minlangan.
Tantanali ochilish marosimida, Sariosiyo tuman hokimi Odiljon Yaqubov ishtirok etib, yangi uy-joy egalarini samimiy qutladi hamda yangi xonadon sohiblariga ezgu tilaklar bildirdi. Xususan, bu kabi loyihalarning barpo etilishi tuman ko‘rkiga ko‘rk qo‘shish bilan birga aholimizning yashash sharoitlarini yaxshilashini ta’kidlandi.
Ochilish marosimidan so‘ng, nuroniylar hamda keng jamoatchilik vakillari yangi barpo etilgan xonadonlarda yaratilgan sharoitlar bilan yaqindan tanishishdi.
Yangi turar joy majmuasi zamonaviy talablarga mos loyihalashtirilgan bo‘lib, infratuzilma, yo‘l-yo‘laklar, bolalar maydonchalari va yashil hududlar bilan ta’minlangan. Mazkur loyiha aholi turmush darajasini oshirish, uy-joy bilan ta’minlash borasidagi izchil islohotlarning amaliy natijasidir.