Tadbirkorlarga keng imkoniyat
2025-12-04 14:00:00 / Yangiliklar
Sariosiyo tumanida tadbirkorlikni rivojlantirish, yangi tashabbuslarni amalga oshirish bilan birga, ayrim sabablarga ko‘ra faoliyati to‘xtagan korxonalarni sog‘lomlashtirish va ularning ishlab chiqarish quvvatlarini qayta tiklash bo‘yicha tizimli ishlar olib borilmoqda.
Xususan, “Zahid Sharifiy” mas’uliyati cheklangan jamiyati xorijiy korxonasi tomonidan tumanning Shabnam mahallasida kiyim-kechak ishlab chiqarish loyihasi amalga oshirilmoqda.
Tuman hokimi Odiljon Yaqubov mazkur korxonada olib borilayotgan ishlar bilan tanishdi. Korxona faoliyatini sog‘lomlashtirish maqsadida tegishli tashkilotlar bilan hamkorlikda amaliy chora-tadbirlar ko‘rilmoqda.
Tashrif davomida, korxonani to‘liq sog‘lomlashtirish va qayta ishga tushirish natijasida yillik ishlab chiqarish hajmini 8 mlrd. so‘mga yetkazish, shuningdek, 150 taga yaqin yangi ish o‘rinlari yaratish imkoni mavjudligi qayd etildi.
Mas’ullarning axborotlari tinglanib, loyiha bo‘yicha manzilli yondashuv asosida ishlash va to‘liq quvvatda ishga tushirish, ishlab chiqarish va eksport hajmini oshirish, yangi ish o‘rinlari yaratish vazifalari belgilandi.